Neşe Ozgen pare kerd ke ê armanc kenê ke bi Kampanyaya ‘Ez wazena Abdullah Ocalanî zîyaret bikera’ vengê kurdan bêro eşnawitene û vengê her kesî da ke tewrê kampanya bibê.
Serkêşîya ‘Platformê Aştîye û Azadîye yê Ewropa’ (EFFP) Kampanyaya ‘Ez wazena Abdullah Ocalanî zîyaret bikera’ dîyabî destpêkerdene. Endama Koordînasyonê EFFP’yî Prof. Neşe Ozgen derheqê babete de ANF’î rê qisey kerd.
Neşe da zanayene ke grubanê sey European Leftve The Left of the European Parliamentî paştî daye kampanya. Neşe vat: ‘’Armancê kampanya yo esas xora caardişê azadîya Abdullah Ocalanî yo. Îmrali de 26 serran ra nata tecrîdêk yeno caardene. Nika qalê prosesê çareserîye yeno kerdene. Kerdoxê nê prosesî kurd ê û ganî kurdî bieşkê bi rehetî qisey bikerê.
Mabênê wird hetan de pêvînayîşî dewam kenê; la mîyanê înan de ma tena vengê dewlete eşnawenê. Ganî ma vengê kurdan zî bieşnawê. Ganî vengê Ocalanî û kurdan zî bêrê eşnawitene. Ma armanc kenê ke bi Kampanyaya ‘Ez wazena Abdullah Ocalanî zîyaret bikera’ vengê kurdan bêro eşnawitene.’’
Neşe pare kerd ke înan çarçewa kampanya de hashtagê ‘VisitOcalan’î akerdo û kampanya do bi dergûdila dewam bikera. 5ê temmuze de ma do telekonferansêkê pîlî virazê. 15ê hezîrane de ancî Ewropa de konferansêko pîl do bêro kerdene. Ma kenê ke pêro beşê komelî tewrê nê xebatan û kampanya bibê. Safhaya diyîne ya kampanya de ma do seba pêvînayîşê Ocalanî Wezîrîya Edaletî rê muracat bikerê.
Heqê her kesî est o ke tepişteyanê sîyasîyan de raşta raşte pêvînayîş bikero. Ganî Wezîrîya Edaletî herinda ke bahaneyan bivîna ganî rayîrê pêvînayîşan abikera. Ziwanê ma nerm o la no waştişê ma yê demokrasîyî nêkêmîneno. Ma venga her kesî danê ke tewrê kampanya bibo û seba pêvînayîşê Îmraliyî muracatê Wezîrîya Edaletî bikero.’’
