Endamê Akademîya Zanistanê Komelkî ya Abdullah Ocalanî Duran Kalkanî vat ke ê prosesî seba AKP yan zî dewlete ney, seba ke înan bawer kerdo ke raşt o, domnenê û bale ante hêrişanê şerê taybetî yê Kurdîstanî ser o.
Endamê Akademîya Zanistanê Komelkî ya Abdullah Ocalanî Duran Kalkanî roportajê xo yê televîzyonê Medya Haberî de rojevî erjna.
Duran Kalkanî vat ke her çiqas ke rantçî zî bibê, do peyser nêrê PKKyê verênî û vat: “Ma sey sermuzakerekerdox Rayber Apoyî dîyar kerd. Mîyanê 14-15 aşmanê vîyarteyan de ma tim tepşê xo zelal mojna. Ma vat azadîya fîzîkî ya Rayber Apoyî, kilîtê her çî yo. Eke qanûn çîyêko wina bigîro xo mîyan, weş o; la eke nêgîro, na xeta ma ya sûr a, qerarê Kongreya ma ya 12. zî bi. Têgêrayîş û şar do naye pozîtîf nêvînê.”
Duran Kalkanî îfade kerd ke eşkerayîya peyêne ya MGK’yî (18ê hezîrane) nêzdîbîyayîşê AKP û dewleta tirkan mojneno û vat: “Prosesî hema sey teror gênê dest, çarçeweya têkoşînê vera terorî de gênê xo dest. Tu çîyêko newe çin o. Hema ‘PKK rêxistina terore’ vanê. Wina aseno ke MGK wazeno PKK dewam bikero. La PKK fesih bi; ma vurîyayî, do peyser nêro. Ma nê prosesî seba dewlete ney, seba AKPyî ney, seba ke ma bawer kenê ke raşt o, domnenê.”
Duran Kalkanî bale ante ke dewleta tirkan bi metodanê şerê taybetî Kurdîstan de teror keno û vat: “Gerîla çekê xo veşnayî, tena seba asayîşê xo bi tifingêk vindeno. La înan xeylê însanî çekdar kerdî, eştî serê komelî. Tayfaya qorîcîyan est a; însanan nêverdanê warî, dewanê înan vêşnenê, keyeyanê înan rîjnenê, heywananê înan kişenê. 16 aşmî yo gerîlla ra çi vejîya? Çîyêk. La qorîcîyan çi nêkerd?”
Duran Kalkanî derheqê şerê ABD-Îsraîl-Îranî de vat ke no şer şerê şarê Îranî ney, şerê sîstemê modernîteya kapîtalîst o û feydeyanê zereyî ra peyda bi û resa kîlîtbîyayîşê tîcaretê Neqebê Hurmuzî. Vat ke ganî Îran nê hedîseyan ra ders bivejo, îdaman bivindarno û bibo demokratîk.”
Duran Kalkanî derheqê hedîseyê Şemzînan ê çawişê pisporî de vat: “O xo zî kişeno, domananê xo zî cinet vîyarnayo.” Bale ante ke seke hedîseya Gulistan Doku û Rojin Kabaîş de bi, nê hêrişî zî hetê çeteyanê şerê taybetî ra ke dewlete rêxistine kerdî, yenê kerdene.
Duran Kalkanî venga ciwananê kurd û cepheya sîyasetê demokratîkî da ke berpirsîyarîya xo biyarê ca û Têgêrayîşê Komunanê Demokratîkan aver berê: “Sîyaseto demokratik sîyaseto komelgir o, sîyasetê dewletgir ney. Ganî ciwanî komel mîyan de bibê, rêxistinkerde bibê, vera her tewir şerê taybetî têkoşîn bikerê. Rastê şerê taybetî ameyîş qeder nîyo.”
Duran Kalkanî derheqê fedayîye de vat: “Hezîrane aşma fedayîyan ya. Fedayîye tena şerî de nêbena; fedayîye manaya beşdarbîyayîşê cuya azade û komûnal a bi cesaret û fedakarîyêka girde dana. 30 serrî yo ma na xete de, xeta azadîya cinî, pêşengîya cinîyan, xo perwerde kerd. Ez bi rêze û minet serrgêra 30. ya şehadetê hemraye Zîlane û serrgêra 7. ya şehadetê hemray Helmetî yad kena.”
