Hemserekê DEM Partî yê Pêroyî Tuncer Bakirhan û Tulay Hatîmogullari temsîkaranê 31 welatan reyde ameyî têhet. Têhetameyî de rewşa Rojawanî û Kurdan ame qiseykerdene
Hemserekê Pêroyî yê Partîya Têduştî û Demokrasîya Şaran (DEM Partî) Tulay Hatîmogullari û Tuncer Bakirhanî, Anqara de temsîlkaranê dîplomatîkan ê 31 welatan reyde ameyî têhet. Têhetameyîş de ke tede Delegasyonê YE’yî û temsîlkarê welatanê sey Almanya, Fransa, Awusturya, Îspanya, Belçîka, Çekya, Yewnanîstan, Portekîz û DYA, Îngîlîstan û Brezîlya est bî, Hatîmogullari dîyar kerd ke ganî statuyê kurdan bêro şinasnayene. Bakirhanî zî dîyar kerd ke hêrişê ke vera DEM Partî û şaredarîyanê aye benê dewam kenê.
Têhetameyîşo ke hetê Hemverfekanê Komîsyonê Têkilîyanê Teberî yê Partîya DEMî Ebru Gunay û Berdan Ozturkî ra ameyo organîzekerdene, tede Hatîmogullari va “Nika karê ma pêroyîne o yo ke prosesêkê aşitîyane û îdareyêkê ke her qat tede ca bigîro, temîn bikerê.”
‘Ganî statuyê kurdan bêro şinasnayene’
Hatîmogullari hêrişê ke Sûrîye de vera kurdan benê, înan ser o qisey kerd û va ke modelo ke kurdan awan kerdo, seba çareyî modelo tewr raştên o û hêrişî zî wazenê nê modelê çareyî ortey ra wedarê. Hatîmogullari dîyar kerd ke ganî statuyê kurdan bêro şinasnayene û va “Ganî îmkan bêro dayene ke ê şaranê bînan reyde seypê biciwîyê.”
Bakirhanî zî dîyar kerd ke seba pêroyê derûverê eleqedarî ganî hem herême de hem zî Tirkîya de hedîseyê ke qewimîyenê, çarçeweya prensîbanê demokrasîya pêroyî û huqûqî ra nêzdî ra bêrê cigêrayîş û etudkerdiş.
