Heyetêkê Dayîkanê Aştî çarçewaya prosesê Aştî û Komelê Demokratîkî de Meclîs de Grûba AKP’yî zîyaret kerd. Dayîkan Mexmela Sipî dîyarîyê AKP’yî kerd û waşt ke na mexmela wa biba wesîleyê awanbîyayîşê aştî.
Heyetê Meclîsê Dayîkanê Aştî bi munasebetê Roja Dayîkan, çarçewaya prosesê Aştî û Komelê Demokratîkî de zîyaretê xo yê partîyanê sîyasîyan domneno. Zîyaretê peyên ê heyetî AKP reyde ame kerdene. Heyetê Dayîkanê Aştî Behîye Yalçin, Afîfe Kartal û Muzeyyen Butun ra yeno pê. Verfeka DEM Partî Ayşegul Dogan û parlamentera Amedî ya DEM Partî Adalet Kaya zî heyetî reyde beşdarê zîyaretan bîyî. Heyetê Dayîkanê Aştî dimayê zîyaretanê partîyanê bînan, Meclîs de Grûba AKP’yî zîyaret kerd.
Mexmela Sipî dîyarîyê heyetê AKP’yî ameye kerdene
Heyetê Dayîkanê Aştî zîyaretî de Serekê Grûba AKP’yî Abdullah Guler, Serekwekîlê Grûba AKP’yî Abdulhamit Gul, parlamentera Riha ya AKP’yî Cevahîr Asuman Yazmaci û parlamentera Stenbolî ya AKP’yî Şengul Karsli reyde roniştî. Dayîkanê Aştî sey heme zîyaretanê xo yê partîyanê sîyasîyan reyde, tîya de zî Mexmela Sipî dîyarîyê heyetê AKP’yî kerd. Kombîyayîşî de dayîkan vat ke ê na mexmele dîyarî kenê ke wa biba wesîleyê awankerdişê aştî.
Dayîkê Aştî do badê zîyaretê AKP’yî, vernîê Wezaretê Edaletî de eşkerayîyêka çapemenî bidê û seba pêvînayîşê bi Rayberê Şarê Kurdî Abdullah Ocalanî wezareta de muracat bikerê.
