Platformê Şîyar Be! Têkoşînê Vera Tîryakî do siba Qada Şêx Seîdî ra heta Bedenê Kêneke rayîrşîyayîş organîze bikero. Platformê seba têkoşînê vera tîryakî vengdayîşê beşdarbîyayîşî kerd.
Platformê Şîyar Be! Têkoşînê Vera Tîryakî do siba vera vilabîyayîşê madeyanê kungkerdişan bi sloganî “Vera tîryakî bêveng memane” rayîrşîyayîşêk organîze keno. Rayîrşîyayîş do Qada Şêx Seîdî ra dest pêbikero heta Bedenê Kêneke ya Berê Mardînî dewam bikero. Rayîrşîyayîşî de do vilawekî bêrê vilakerdene û vengdayîşê haydarî û têkoşînê vera madeyan welatijan rê bêro kerdene.
Vilawekî de wina ame vatene: “Ma do siba saete 17:00î de Qada Şêx Seîdî ra heta Bedenê Kêneke rayra şêrê. Ma do vilawekanê xo vila bikerê û vera tehlukeya madeyanî ke kung kenê pîya vengê xo berz bikerê. Vera nê sîstemî ke komelê ma herimneno, seba ke ma taxe, gede û ameyoxê xo bipawê, ma vengdanê ke heme şarê ma û rêxistinê demokratîkî paştî bidî nê rayîrşîyayîşî. Vera tîryakî têkoşîn pawitişê cuye yo! Ma pîya rayra şêrê, pîya bibedilnê!”
