Verfeka DEM Partî Ayşegul Dogan vat: “Ma amadekarîyan kenê ke demêko nêzdî de şêrê Girawa Îmraliyî.”
Verfeka DEM Partî Ayşegul Dogan merkezê pêroyî yê partîya xo de kombîyayîşê çapemenî organîze kerd û hedîseyê ke rojeve de yê erjnayî. Ayşegul Dogan dîyar kerd ke ê kombîyayîşê xo yê rayberîya merkezî organîze kenê û babeta înan a sereke Meclîs de awankerdişê komîsyonî ya û vat: “Ganî Meclîs de gama ewile awankerdişê komîsyonî yo.”
Ayşegul Dogan îfade kerd ke meseleyê kurdî tena problemê kurdan nîyo û ê seba çareserkerdişê problemî amadekarîyan kenê.
Do partîyan reyde pêvînayîşî dewam bikerê
Ayşegul Dogan dîyar kerd ke partîyê muxalefetî yê ke ê înan reyde kom bîyê, waştişê “têkilîya rasterast, resnayîş, babete ser o agahdarkerdiş û zelalîye” kenê. Ayşegul Dogan dîyar ekrd ke ê AKP û MHP reyde zî kom bîyê û nê pêvînayîşî do dewam bikerê û vat: “Ma tena partîyanê sîyasî ke Parlamento de grûba înan est a, înan reyde tena pêvînayîşan nêkenê. Pêvînayîşî dewam kenê û do partîyê sîyasî yê cîyayan ê ke Parlomento de temsîlîyetî înan çin o, înan reyde zî dewam kenê. Nê pêvînayîşî do serdemo newe de zî dewam bikerê. Nê pêvînayîşan ra pey eşkerayîyî nuştekî ameyê dayene.”
‘Ma do demêko nêzdî de şêrê Îmrali’
Ayşegul Dogan bale ant pêvînayîşan ser o ke Abdullah Ocalan reyde yenê kerdene û wina vat: “Ma sey DEM Partî amadekarîyan kenê ke şêrê Girawa Îmrali. Ma bi heyeto ke endamanê Rayberîya Merkezî ya partîya ma û hemserekanê ma ra yeno pê, do şêrê Girawa Îmrali. Em amadekarîyan kenê ke rasterast birêz Ocalan reyde pêvînayîş bikerê û ey reyde bişêwirî seba ke nê serdemî fehm bikerê û bidê fehmkerdiş û hîna bihêz xo rêxistin bikerê. Ma do sey heyetêkê DEM Partî demêko kilm de ey zîyaret bikerê. Reyna îhtîmal est o ke birêz Ocalan reyde rojanê ameyoxî de bi temsîlkaranê partîyanê sîyasî yê cîyayan reyde zî pêvînayîş bikero.”
‘Birêz Ocalan wazeno Barzanî, Ebdî û Talabanî reyde pêvînayîş bikero’
Ayşegul Dogan qiseykerdişê xo domna û wina vat: “Demo ke ma giranî û hîrayîya problemî gênê çiman ver; ma fikirîyenê ke do seba birêz Ocalanî bifeyde bo ke birêz Mazlum Ebdî, birêz Mesut Barzanî, birêz Nêçirvan Barzanî, birêz Qubat û Bafil Talabanî reyde pêvînayîşan bikero. Ma zî zanê ke o wazeno nê pêvînayîşan bikero. Ma wazenê nê çîyî raya pêroyî reyde pare bikerê. No waştişê birêz Ocalanî yo. Ma zî fikirîyenê ke do no çî bifeyde bo. No semedî prosesê ameyoxî zî lazim o.”
