Maçê fînal ê Turnuvaya Futbolî yê Sirri Sureyya Onderî ke hetê Şaredarîya Artemêtî ra ameyêne kerdene, ame kaykerdene. Maçî ra pey meydanê qeza de konser ame organîzekerdene.
Maçê fînal ê Turnuvaya Futbolî yê Sirri Sureyya Onderî ke hetê Şaredarîya Artemêtî ya Wanî ra ameyêne organîzekerdene, ame kaykerdene. Maçî ra pey meydanê Artemêtî de konser ame organîzekerdene. Hunermend Murad Demîr û Ozlem Baglayan sehne girewt û temsîlkarê partîyanê sîyasî û rêxistinê komelkî zî beşdar bîyê.
‘Heta peynî seba aştî hewl da’
Hemşeradarê Wanî yê Şarîstanê Girdî Abdullah Zeydan ke herinda ey de qeyûm ameyo tayînkerdene, dîyar kerd ke turnuva seba vîrardişê Sirri Sureyya Onderî ameya kerdene û vat: “Heta peynîya emrê xo seba aştî hewl da. O ke keweno milanê ma ser o zî hêvîya ey a aştî bicaardiş o. Ma prosesêko newe de yê. Şarê kurdî bedêlê gelekî giran dayê. La ma ewro nêzdîyê aştî û azadîye yê. Vengdayîşê Rayberê Şarê Kurdî Abdullah Ocalanî ra pey keyfweşîyê ma yê winasînî zî do mîyanê aştî û azadîye de bî.”
Çalakî konserî ra pey û girewtişê govende ra pey qedîya.
