Goreyê medyaya Îranî mîyanê 12 rojanê şerê Îsraîlî reyde bi îdiaya ‘Mosaadî reyde hemkarî kerda’ 700 kesî ameyê destbendkerde.
Goreyê ajansê Xeberan a Mehr ke nêmfermî ya, yekîneyê îstîxbaratî yê Komara Îslamî ya Îranî mîyanê 12 rojanê şerê Îsraîlî reyde 700 kesî ameyê destbendkerde. Xebere de nê kesî sey ‘700 leşkerê Îsraîlî yê seba pereyan şer kenê’ ameyê pênasekerdene.
Rayedarê Îranî dîyar kerd ke hêrişanê Îsraîlî reyde hemdemî mîyanê welatî de damêka sîxurîyî ya ‘Rejîmo sîyonîst’ kewtê mîyanê têgêrî û îdia kerd ke na dame bi gîranî ame binvistene.
Destbendkerdiş bi giranî Kirmanşah, Îsfahan, Huzîstan, Fars û Loristanî de ameyê kerdene.
3 kesî ameyê dardekerdene
Îran de seba vindarnayîşê nerazîbîyayîşê komelî û muxalîfan bêyî muhakemekerdişêko adilane, merdimî ameyê dardekerdene.
Goreyê xebera ajansê xeberan a fermî ya wezîfeyê dadgerîye Mîzanî, 3 kesî bi îdiaya ke Mossadî rê sîxurî kerda ameyê dardekerdene. Ame eşkerakerdene ke heme hîrê kesî serê sibaya roja çarşeme ameyê dardekerdene.
Nerazîbîyayîşê rêxistina efûyî
Rêxistina Efûyî ya Mîyanneteweyî 20ê hezîrane de bi eşkerayîyêk vengda rayedaranê Îranî ke înfazanê keyfîyan ra fek veradê.
