Cemîyetê Rojnamegaranê ke Xebitîyenê yê Şirnexî derheqê rojnameger Zeynep Durgut de tehdîdê ke ameyê kerdene eşkerayî daye û vat: “Ma vera nê zîhnîyetî bêveng nêmanenê û ma hemkara xo reyde yê.”
Rayberîya Komîteyê Cemîyetê Rojnamegeranê ke Xebitîyenî yê Şirnexî derheqê rojnameger Zeynep Durgut ke riyê xeberanê xo yê derheqê “Çeteyê Fihûşî” de endamê keyeyê Kenan Tatarî ra ameybî tehdîtkerdene, eşkerayî daye. Eşkerayî de wina ame vatene: “Hemkara ma Zeynep Durgut a ke bi xebera xo Şirnex de ‘çeteyê fihûşî’ vetbî orte, hetê keyeyê endamê çeteyê fihûşî ra ke dewa de ameyêne muhakemekerdene, aye tehdît kerdbî. Ma nê tehdîdî qebul nêkenê. No tehdîdo ke seba rojnamger a ke karê xo kerdêne, ameyo kerdene, tena tehdîdêko vera çapemenî nîyo. Eynê wextî de hêrişêko vera heqê agahdarkerdişê raya pêroyî yo. Ma do vera nê zîhnîyetî bêveng nêmanê. Ma Zeynep û heme rojnamegeran reyde yê.”
Rayberîya Cemîyetî dîyar kerd ke seba tehdîd û zilmê vera rojnamegeran do piştgirîya xo bidomnê.
