Rîyê nêweşîya tebekî (SAT-2) ke heme cayê Tirkîya de vila bîyo, hetê Wezaretê Zîreet û Daristanî ra xirbe ameybî padayene. Hetê ekîbanê Serekîya Daîreya Karanê Weşîye yê şaredarîya ma ra xirbe de xebata dezenfektekerdişî ameye kerdene.
Xebatê Serekîya Daîreya Ma ya Karanê Weşîye ke seba pawitişê weşîya şarî yenê kerdene, dewam kenê. Çerçewaya nê xebatan de xirba heywanan ke rîyê nêweşîya tebekî ra seba demêkî ameya padayene, ameye dezenfektekerdene.
Seba ke nêweşî mîyanê heme heywananê şaristanî de vila nêba seba tedbîrî 2ê temmuze ra qerar ame girewtene ke xirbe bêro padyene. Seba ke demêko tewr kilm de xirbe reyna xizmet bida şarî xebatan dest pêkerd.
‘Metodo tewr tesîrdar derzîn a’
Baytara ma ya ke Serekîya Daîreya karanê Weşîye de xebitêna, Helîn Demîr îfade kerd ke na nêweşî şarî mîyan de yena zanayene û seba mal û cuya heywanan zaf bitaluke ya. Dîyar kerd ke na nêweşîya bi rêz, mîze û hilmî reyde şêna xo biresno heywananê bînan. Zaf bilez vila bena. Coka metodo tewr tesîrdar o yo ke ma heywananê xo derzîne bikerê. sewbîna ganî dormeyê axur û hewşanê şarî bêrê dezenfektekerdene.
‘Xebatê ma do dewam bikerê’
Demîre wina va: “Vera na nêweşîya muhîme de xebatê şaredarî do dewam bikerê. Heywanê ke xirbe de bîyî ameyî tahlîyekerdene û binîzan xirbe yena dezenfektekerdene. dezenfektano tewr tesîrdar ame weçînayene.”
