Girewteyo nêweş Abdullah Aksu 31 serran ra pey hepisxane ra veradîya.
Abdullah Aksu ke Hepisxaneyê Hûmara 3. yê Tîpê T yê Îzmîrî de ameyêne girewtene, 31 serran ra pey veradîya. Aksu hetê keyeyê xo û rayberanê Komela Piştgirîya bi Keyeyanê Girewteyan reyde û Hikumwerdoxan ya Egeyî (EGE-TUHAYDER) ra ame pêşwazîkerdene.
Aksu hepisxaneyî ver de qisey kerd û dîyar kerd ke seba veradayîşê xo keyfweş o la riyê tehlîyenêbîyayîşê girewteyanê nêweşan ra xemgîn o û vat: “Ez hêvîdar a ke heme girewteyî bêrê tehlîyekerdene. Rayberî (Abdullah Ocalan) rayîrê aştî akerd. Ez hêvîdar a ke demêko kilm de aştî biba û embazê ma veradîyê ke ma welatêko azad de yewbînan bivînê.”
Aksu keyeyê xo reyde ver bi keyeyê xo yo Sêrtî kewt rayîr.
Aksu serra 1994î de Sêrt de ame girewtene û bi îdiaya “Herimnayîşê yewî û yewpareyîya dewlete” Mehkemaya Ewlekarîya Dewlete ya Amedî cezaya muebedî daye ey. Aksu hepisxaneyanê Sêrt, Dîlok, Amed û Şakranî de mend.
Nêweşîyê fitiqê paştî, tansîyon, mîde, çim û kateyan Aksu de vejîyayî.
