Serekê Baroya Amedî Abdulkadîr Guleç derheqê mesajê Rayberê Şarê Kurdî Abdullah Ocalanî de dîyar kerd ke demê çekan qedîyayo û do sîyaset aver şiro. Abdulkadîr Guleç waşt ke êdî dewlete goreyê naye gam bierzo û komîsyon awan bikero.
Rayberê Şarê Kurdî Abdullah Ocalan 27ê Sibate de vengdayîşê “Aşîtî û Komelê Demokratîkî” kerd. Dima vengdayîşê ey, Partîya Karkeranê Kurdistanî (PKK) 12ê Gulane de netîcenameyê kongreya xo aşkere kerd û va ke xo fesîx kerdo. Rayberê Şarê Kurdî Abdullah Ocalan 9ê Temuze de bi dîmen vengdayîşê bînêko tarîxî raya pêroyî reyde pare kerd.
Rayberê Şarê Kurdî Abdullah Ocalan dîyar keno ke proses resayo qonaxêka newîye û vengdayîşê çekronayîşê gerîlayan ra kerd. Dima nê vengî mîyanê komelî de hereketêk dest pê kerd. Serekê Baroya Amedî Abdulkadîr Guleç derheqê vengî de Ajansa Welat (AW) rê qisey kerd.
“No mesaj destpêkerdişê prosesêko newe yo”
Abdulkadîr Guleç dîyar kerd ke no mesajê Rayberê Şarê Kurdî Abdullah Ocalanî yê bi dîmen dewamê vengdayîşê 27ê Sibate yo û va: “Dima 26 serran reya verêne Birêz Abdullah Ocalan bi dîmen mesajî dano. No zaf muhîm o. No mesaj qedîyayîşê prosesê çekan o. No veng beno destpêkerdişê prosesêko newe. Têkoşînê sîyasetê demokratîkî do dest pê bikero. No veng nîşan keno ke rayîr û metod demokrasî û sîyasetê demokratîkî yo. Eger nê çîyî ca nêbîyî do proses zî aver şîro. Coka ke hemeyê kesî çiqas ke beşdarê prosesî bibî do proses zî hetê şarî de hendî xurt bibo. Do proses bêastengî çareser bibo. Yew îfadeyêko tarîxî yo. Yew dewr ame girewtiş, dewrêko newe dest pê keno.”
Abdulkadîr Guleç destnîşan kerd ke Rayberê Şarê Kurdî Abdullah Ocalan îfadeyê xo de parlamentoyî nîşan keno û wina domna: “Kesê ke çek ronayî do senî beşdarê komel û sîyasetî bibî? No çî zaf muhîm o. Ez bawer kena ke serê nê babetan de qiseykerdiş ameyo kerdiş. Avzel o ke proses bi lez bîqedîyo û goreyê ey qanûn bêro vetene. Ganî komîsyon bêro awankerdene û nê çîyî komîsyon de bêrî nîqaşkerdiş. Uca de heme partîyî fîkranê xo bîyarî ziwan. Yew qerarêko baş seba prosesî û komelêko demokratîk do vejîyo.”
“Ganî desthilatdarî goreyê prosesi gam bierzî”
Abdulkadîr Guleç bi vîr xist ke tayê gamî ameyî erdiş la nê gamî hîna zî pirsgireka kurd çareser nêkenî û wina dewam kerd: “Mesajê bi dîmen gamekê pozîtîfî yo. No 26 serrî yo şarê kurdî wazeno ke tecrîdê serê Birêz Abdullah Ocalanî bierzo. Ewro Birêz Abdullah Ocalan bi dîmen beşdarê prosesî beno. No zaf muhîm o. La tena bi dîmen pirsgirekî çareser nêkeno. Ez bawer kena ke rojanê verên de gamê muhîmî do meclîs de bêrî ardiş. Ma hêvî kenî ke meclîs de komîsyon bêro awankerdêne. Xoza Birêz Abdullah Ocalan mesaj de vano ke kam verî gam bierzo muhîm nîyo. Çîyo muhîm o ke ameyîşê peynîya prosesî yo. Birêz Abdullah Ocalan vano ke; ‘Azadîya mi bi azadîya komelî reyde giredaye ya. Komel çiqas azad bo, ez zî hendî azad a. Mi no proses seba azadîya xo dest pê nêkerdo.’ Komel do senî azad bibo, gamê senî bêrî erdiş nê prosesî de ê muhîm ê. Dima çekronayîşî ganî desthilatdarî zî seba prosesî gam bierzo.”
