Grûba Aştî û Komelê Demokratîkî ya PKK’yî eşkefta Casenê de merasîmê gama tarîxî kerd. Vîdeoyê nê merasîmî ame parekerdene.
Grûbêka gerîllayanê PKK’yî vengdayîşê Rayberê Şarê Kurdî Abdullah Ocalanî ser o ewro şaristanê Silêmanî yê Herêma Federe ya Kurdîstanî de eşkefta Casenê de merasîmê veşnayîşê çekan viraşt. Seba taqîbkerdişê merasîmê PKK’yî Vakurê Kurdîstan û Tirkîya ra, xeylê sîyasetmedar, roşnvîr, rojnameger, nuştox, endam û rayberê sazgehanê sîvîlan û temsîlkarê partîyan vizêr Amed ra ver bi Silêmanî kewtbî rayîr. Merasîmê gama tarîxî ya PKK’yî verê nêmrojî destpêkerbi.
Merasîmê îmhakerdişê çekan yê Grûba Aştî û Komelê Demokratîkî ewro saete 11:25î de dest pêkerd, 11:45î de qedîya. Merasîmê PKK’yî de Endama Konseyê Rayberdişî ya KCK’yî Besê Hozat tewr vernî de ca girewt.
Mîyanê Grûba Aştî û Komelê Demokratîkî de Endama Konseyê Rayberdîşî ya KCK’yî Besê Hozat, Nedîm Seven, Têkoşîn Ozan û Tekîn Mûşî û înan reyde 15 cinî û 15 camêrdî pêro pîya 30 gerîlayî grûbe de ca girewt ca girewt.
Destpêkê merasîmî de Besê Hzoat qisey kerd û vat: “Vernîya vengdayîşê Rayber Apoyî de seba ke helwêstê xo dîyar bikerê, ma ameyê tîya. Seba ke ma nê prosesî aver berê, verê înkar û îmhayî ma çekî girewtî. Ma Şervanê Azadîye yê. Bi vengdayîşê Rayber Apoyî, bi vengdayîşê 27ê sibate û bi wesîleyê qeraranê Kongreya 12. ya PKK’yî ma na game erzenê.”
Besê Hozat qiseykedişêko kilmî ra pey nameyê grûbe ser o bi tirkî eşkerayîya xo wende. Dima zî Nedîm Sevenî bi kurmancî wende. Wendişê eşkerayîyan ra pey Besê Hozat reyna qisey kerd û vat: “Seba dewamê gaman lazim o sererastkerdişê qanûnî bêrê kerdiş.”
Besê Hozat dîyar kerd ke seba abîyayîşê vernîya prosesî ê çekan îmha kenê. Eşkerayî û qiseykerdişan ra pey sere de Besê Hozat, heme gerîlayan çek û qayîşê xo veşnayî. Gerîlayî dimayê veşnayîşê çekanê xo herême ra şîyê. Dima ke gerîlayî qade ra şîyê, merasîm qedîya.
