Rayedarê Komeleya Şêx Seîdî Ramazan Ariyo ke beşdarî merasîmê tarîxî bi, va ke Hereketa Azade ya Kurdî, îradeyêko xurt seba awankerdîşê çareserîyêka demokratîk mojna, sey ke demanê verênan de kerd û wina va: “Vengê Birêz Abdullah Ocalan destpêkerdişê prosesê aşîtî temsîl keno û seba heme şaranê herême hêvî dano.”
Komêka gerîllayanê PKK’yî vengdayîşê Rayberê Şarê Kurdî Abdullah Ocalanî ser o şaristanê Silêmanî yê Herêma Federe ya Kurdîstanî de merasîmê îmhakerdişê çekan viraşt û koma gerîlayan ra Hemsereka KCK’î Besê Hozat zî rayberî kerd.
Seba taqîbkerdişê merasîmê PKK’yî, Kurdîstanê Vakurî û Tirkîya ra, xeylê sîyasetmedar, roşnvîr, rojnameger, nuştox, endam û rayberê sazgehanê sîvîlan û temsîlkarê partîyan Amed ra ver bi Silêmanî kewtbî rayîr û merasîmo tarîxî teqîp kerdbî.
Înan ra yew zî Rayedarê Komeleya Şêx Seîdî Ramazan Ari bi, Ramazan hîs û ramanê ajansê ma reyde pare kerd.
Waştişanê aştî, demokrasî û adaletî
Rayedarê Komeleya Şêx Seîdî Ramazan Ari va ke Hereketa Azade ya Kurdî, îradeyêko xurt seba awankerdîşê çareserîyêka demokratîk mojna, sey ke demanê verênan de kerd û wina va: “Vengê Birêz Abdullah Ocalan destpêkerdişê prosesê aşîtî temsîl keno û seba heme şaranê herême hêvî dano. Îmhakerdişê çekan tena eşkeno sey gamekê verênî nê prosesî de bêro hesibnayene; labelê, muhîm o ke heme aktorê sîyasî û komelkî, bi serekîya Birêz Ocalan û hukumatî, berpirsîyaranê xo yê krîtîkî bîyarî ca ke waştişanê şarî yê seba aştî, demokrasî û edaletî xurt bikerî.”
Mîyanê şaran pirdê aştî
Ramazan Ari eşkera kerd ke hadrebîyayîşê înan ê sey şopkarê nê prosesê tarîxî û muhîmî de seba ey û sazîya ke ey temsîl keno zaf manadar o û wina qedîna: “Wezîfeyê raştêne nika ra dima dest pê kena. Sey derwêşêkî, ma do nêvinderî heta ke ma Rojhelatê Mîyanênî yê dadmend û aşîtîyane seba aşîtîya şarê xo û heme şaranê bînan awan bikerî. Bi pîya, ma do mîyanê şaranê kurd û tirkî de pirdê aştîye awan bikerî.”
