Cenazaya Dayîka Şemeyî Emîne Ocake, Meydanê Galatasarayî de ame oxirkerdiş. Merasîm de Endama Heyetê Îmraliyî Pervin Buldan wina va: “No meydan, meydanê Dayîka Emîne yo ke maya ma ya pêrûnan a.”
Dayîka Şemeyî Emîne Ocake ke 20ê Hezîrane de semedê krîzê qelbî yê girêdayeyê bênefesîye ra tedawî dîyêne, 22ê Temuze de cuya xo kerd vîndî.
Cenazaya Emîne Ocake, Meydanê Galatasarayî de, cayê xoverdayîşê çalakîyanê merdimanê Şemeyî de ame oxirkerdiş. Ablûqaya polîsan a serê Meydanê Galatasarayî ke vera qeraranê îxlalî yê Dadgeha Qanûnê Bingeyî (AYM) bi hawayêko keyfî dewam kerdene, seba merasîmê cenaza hewanîyaye.
Hemsereka Komela Heqanê Merdiman (ÎHD) Eren Keskîn, Endama Heyetê Îmraliyî Pervîn Buldan, merdimê Şemeyî, sazîyê komelê sîvîlî, avûkatê heqanê merdiman, Dayîkê Aştîye, partîyê sîyasîyî û bi hezaran kesî tewrê merasîmî bîyî.
Cenazaya Emîne Ocake ardî Meydanê Galatasarayî. Serê masaya ke tabûta aye ser o ya, fotografê aye û pankarta “Mi fek vera nêda, ma do fek vera nêdê” elaqnîyaye û serê tabûte de qerenfîlî ronîyayî.
Cenaza, bi wendişê cuyeya Emîne Ocake dest pê kerd.
‘Milyonan rê bî hêvî’
Masire Ocake ke keynaya Emîne Ocake ya, qisey kerd û va: “Maye mi dejî ra sebir, sebir ra zî hêvî ardene. Maye mi, ma rê tena nîyê, milyonan rê bî hêvî. Her tim payra mend. Tena dejê xo nê, dejê her kesî zî zerrîya xo de cuya. Ma çimanê to de dejê vînîkerdoxan hîs kerdî. Ma înan nêeşkenê vîr bikerî. Nika ma to, hetê Hasanî ra erşawenî. Hafizaya şarêk bi zerrîya mayêke lerzena. Ma do seba pêro may, baw û merdimanê xo ke ma înan vîndî kerdî, têkoşîn bidî.”
Hanım Tosun ke cînîya Fehmi Tosunî yo kiştoxê ci meçhul ê, va: “Dayîka Emîne rê soz bo, ma têkoşînê to cêr de nêverdî. Oxir bo. Hetê to de mayê bînî estê ke to pawenê. Dayîka Elmas, Dayîka Berfo, Hasan uca de yê. Demo ke ti Hasanî hembêz kerd, ma zî do keyfweş bibî.”
‘Oxir bo Dayîka Emîne’
Endama Heyetê Îmraliyî Pervin Buldan zî wina va: “No meydan, meydanê Dayîka Emîne yo ke maya pêroyanê ma ya. No meydan, meydanê têkoşînî yo ke 30 serrî verî dest pê kerdî. Ti mîlyonan ra kesî dima xo de verada. Hasanî rê, Savaşî rê, Abdullahî rê selam vaje. Kiştoxî do bêrî muhakemekerdene, do hesab bidî. Oxir bo Dayîka Emîne.”
‘Ma ci ra zaf çî musa’
Hemsereka ÎHD’î Eren Keskin, çalakîya ke Emîne Ocake dabî destpêkerdene, ard vîr û wina domna: “Dayîka Emîne kesêk a ke çalakîya îtaetnêkerdişê sîvîlî dabi destpêkerdene. Têkoşînê mayanê Şemeyî wina wayîrê quwetî bi ke ewro mecbur mendî nê meydan biakerî. Ma ci ra zaf çî musa.”
Merasîm bi sloganê “Daye ma ewta de yê” qedîya.
Hetê Hasan Ocakî de do defin bibo
Cenazeya Emîne Ocake saeta 16.00 de do Cemxaneyê Gazi rê bêro berdiş. Dima zî do Goristanê Gazî de, hetê lajê xo Hasan Ocakî de bêro definkerdiş.
