Festîvala Kultur û Xoza ya Munzurî ya Dêrsimî ya 23. bi konseran dest pêkerd û festîvale de sloganê ‘’Bijî Serok Apo’’ ame berzkerdene. Serekê DEDEF’î Alî Riza Bîlîr va ke xîret kenê ke herra înan bi sîyanurî jehrîn bikerê.
Festîvala Kultur û Xoza ya Munzurî ya Dêrsimî ya 23. vizêr bi şîarê ‘’Dêrsim cu ya; Destê xo medê xoza, îrade, bawerî û ziwanê mi’’ dest pêkerde. Roja yewîne Parka Mamekî de bi konserêkî qedîyaye. Wekîla DEM Partî Aytene Kordu, Hemşaredarê Dêrsimî, temsîlkarê partîyanê sîyasîyan û rêxistinanê komelê sivîlî beşdarê festîvale bîyî.
Serekê DEDEF’î Alî Riza Bîlîrî akerdişê festîvale de qisey kerd û dîyar kerd ke ê do bi qerardarî vera wêrankerdişê xoza û asîmîlasyonî vejîyenê û vat: ‘’Xîret kenê ke herra ma bi sîyanurî jehrîn bikerê.’’
Temsîlkaranê partîyanê bînan zî îfade kerd ke seba awankerdişê komara demokratîke ganî heqê elewîyan û kurdan Qanûnê Bingeyîyî de bêrê cakerdene.
Qiseykerdişan de sloganê sey “Bijî Serok Apo”, “Bê Serok jiyan nabe” û “Em ê bi berxwedanê bi ser bikevin” ameyî vatene. Wekîla DEM Partî Aytene Kordu Vengdayîşê Rayberê Şarê Kurdî Abdullah Ocalanî yê 27ê sibate vist vîrî û va: ‘’Şar do pîya aştîye û demokrasîyî bîyarê nê welatî.’’
Roja yewine de hunermendî Kadîr Çat, Mizgîn Turan, Dîlan Top, Erdogan Emîr û Beser Şahîn vejîyayî sehne ser. Şarî govende girewte.
