Meclîsê Federalî yê Swîsre bi zafîya rayan qirkerdişê Êzîdîyan qebul kerd. Pêşnîyaz de Konseya Federale ya Swîsre ra ame waştene ke seba tazmînatê sûcanê ke ameyê kerdene kampanyayêka mîyannetewîye wa bêra kerdene.
Parlamenterê Meclîsê Federalî yê Partîya Sosyalîste ya Swîsre Fabian Molane û Parlamentera Keskan Sîbele Arslan seba ke cînayetê DAÎŞ’î yê vera Êzîdîyan sey qirkerdiş-jenosîdî bêrê qebulkerdene peşnîyazêk dabî Meclîsê Federalî yê Swîsre.
Molinayî roniştiş de pare kerd ke sûcê cerganê DAÎŞ’î yê vera Êzîdîyan çarçewa Peymana Vernîgirewtiş û Cezakerdişê Sûcanê Qirkerdişî de qirkerdiş ê. Molinayî vat: “DAÎŞ’î Êzîdîyî qir kerdî, cinîyê Êzîdîyî kerdî kole û rotî. Nê sûcî pêro ameyî belgekerdene. Ez wazena ke parlamento peşnîyazê ma qebul bikero.”
Sîbele Arslan ard ziwan ke DAÎŞ’î asta jenosîde de Êzîdîyî qetil kerdê û vat: “Neteweyanê Yewbîyayeyan (NY) no sey sûcî pênase kerdo. Xeylê dewletanê cîyayan cewabê ney da û venga NY’yî da. Seba ke na barbarîye bêceza nêmana ma hetkar bibê.”
Qiseykerdişan ra dima bi 62 rayanê “ney”, 27 rayanê “bêteref” û bi 105 rayanê “eya”, peşnîyaz ame qebulkerdene.
Peşnîyaz de nê çîyî ameyî vatene:
“Dewleta Swîsre koçberkerdişê zorî, tecawuz, cînayetê sîstematîkî yê vera Êzîdîyan û wêrankerdişê îbadetxaneyan şermezar kerdî.
Dewleta Swîsre hêrişanê DAÎŞ’î yê 3ê Tebaxa 2014î sey qirkerdişî qebul kena.
Wa seba tazmînatê sûcanê ke ameyê kerdene kampanyayêka mîyanneteweyîye bêra kerdene.”
