Cinîyan bale ant muhîmîyê kombîyayîşê ke bi rojeva komîsyonî ameyê kerdiş ser o û vatî; ganî zemînê huqûqî bêro awankerdiş û tepişteyê nêweşî û sîyasî lezkî bêrê veradayîş. Cinîyan vat ke prosesî ra bi hêvî yê û wina vatî: “Masaya ke serek ci de bibo, kurdî ci ra zirar nêvînenê.”
Derheqê komîsyono ke yeno pawitiş çarçewaya ‘prosesê aştî û komelê demokratîkî’ do bêro awankerdiş, serekê meclîsî Nûman Kurtulmuş temsîlkarê partîyê sîyasî dir 18ê temmuze de meclîs de ameyî têhet. Pêşnîyazîyê verî amebî kerdiş zî la na sewîya de pêşnîyazîyê neweyî ameyî kerdiş. Yeno pawitiş ke tewr tay 44 endaman pê bêro.
Wan de cinîyan derheqê prosesî de erjnayîş kerd û vatî komîsyon muhîm o.
‘Ma komîsyonê muhîm vînenê’
Verfeka Meclîsê Şaredarîya Bajarê Pîlî ya Wanî Leyla Çelîk dîyar kerd ke dimayê vengdayîşê 27ê Sibate ya Rayberê Şarê Kurdî Abdullah Ocalanî proses dest pêkerdo û şarê kurdî wayîr vejîya yo û wina va: “No proses zêdeyêr sazgehê komelê sivîlî û şarî de yeno averşîyayîş. Bi pozîtîf aver şino. Semedo ke lazimîya merdiman bi aştî est a û nê prosesî de çîyo ke bêro kerdiş zî no yo. Çekî ameyî veşnayîş. Bi nameyê aştî de ganî zemînê huqûqî û zemînê destûrê bingehîn bêro kerdiş. Nê hetî ra komîsyon muhîm o.”
‘Şarê kurdî serekê xo rê bawer keno’
Endama Meclîsê Şaredarîya Erdîşî Ayşe Ergun zî wina va: “Şarê kurdî bi serekê xo bawer keno. Ma caardişê kongreya 12ine zî netîceya ci vînenê. Bi vengdayîşî çekî ameyî veşnayîş. Şar paweyê gamanê dewlete yo. Hişê înan de persî est ê. Gamê ke ameyê eştiş muhîm ê la ganî fikrê pêro pêardeyan bibê. Ganî pêro destek bidê. Masaya ke serek ci de bibo, kurdî ci ra zirar nêvînenê. Ma eşkenê nê zelal vajê. Bendewarîya ma destpêkerdişî prosesê huqûqî yo.”
‘Ganî dewlete gaman bierzo’
Endama Meclîsê Şaredarîya Payîzava Herdem Acar zî bale ant serê çîyê ke prosesê çareserî de ameyê ciwîyayîş û wina va: “Gamê ke ameyê eştiş, yew hetî yê. La ganî gamê somutî hetê dewlete ra bêrê eştiş. Komîsyonêk yeno awankerdiş la hema gamêke somut çin a. PKK’yî çeke da ro la hema gamêke somut nêameya eştiş. Tepişteyê nêweşî nêameyê veradayîş. Ganî sere de birêz Abdullah Ocalan û tepişteyê sîyasî bêrê veradayîş. Ganî komîsyono ke yeno awankerdiş de pêro temsîlkarî bibê.”
