Hêrişêkê vera kilîseyêkê ya vakurê rojhelatê Komara Demokratîk a Kongoyî de 43 kesî ameyê kiştene.
Şaristanokê Komanda yê wîlayetê Iturî yê Komara Demokratîk a Kongoyî de şewa şeme (26ê temmuze) vera kilîseyêk hêriş ame kerdene û encamî de ci ra 9 kesî gede 43 kesî ameyê kiştene.
Goreyê Neteweyanê Yewbîyayeyan û artêşê Kongoyî, Hempeymana Hêzanê Demokratîke hêrişî kerdo.
Artêşê Kongoyî ‘qirkerdiş’ şermezar kerd û va: “Zafêrê 40 sîvîlî bi kardan ameyê kiştene û çend kesê bînî zî bi giranî birîndar bîyî. Keye, dikan û awanîyêka bankaya herême ameyê veşnayene û talankerdene. Aqûbetê çend kesan zî nêyeno zanayene.
Serra 2019î de Hempeymana Hêzanê Demokratîkî têkilîya xo ya Rêxistina Dewleta Îslamî-Merkezê Afrîkayî (şubeyê DAÎŞ’î yê Afrîkayî) eşkera kerdbi.
