Goristanê endamanê PKK’yî yê Herêma Feraşînî ameyo rijnayene. Goreyê çimeyanê herême 80 mezelan ra zafêr mezelî goristan de est bîyê la goreyê dîmenan hende mezelî nêasenê.
Herêma Şirnexî de 5 goristanê ke cenazeyê endamanê HPG û YJA-Dtarî tede yê, serranê 2012 û 2015î de ameyê awankerdene û bi seyan cenazeyê endamanê HPG û YJA-Starî tede ameyê hewanayene. Serra 2016î ra pey hêzê artêşa tirke û cerdevanê herême nê goristanî kerdê hedefê xo û bi tank û topan, bi makîneyan ê rijnayî.
Hemverê goristanî de qaleqol ameyo awankerdene
Goristananê ameyê rijanyene ra yew zî goristanê Hindirûnis ê Herêma Feraşînî yê qezaya Elkê ya Şirnexî yo. No goristan serranê 2012 û 2013î de ame awankerdene û sey Şehîdgehê Ş. Memed Goyî (Mehmet Kaplan) û Ş. Rojîn Gewda (Sureyya Aslan) ame pênasekerdene. Goristan deşta dewa Hindirûsî de ameyo awankerdene û nika riyê qaleqolo ke hemverê goristan de ameyo awankerdene, tu kes nêeşkeno şêro goristanî zîyaret bikero. Ajansê ma rixmê heme têmîyanê herême zî xo resna goristanê Feraşînî û vîdeoyê rijnayîşê goristanî antê pêser.
Riyê rijnayîşî ra nêyeno zanayene ke mezelî yê kamcîn endamanê PKK’yî yê
Goristan serra 2017î de hetê cerdevan û leşkeranê artêşa tirke ra ameyo rijnayene. Awanîyê sey camî, mêmangeh û cayê destnimajî bi bombayan ameyê rijnayene, mezelê endamanê HPG û YJA-Starî ameyê texrîbkerdene. Reyna seba ke hendê ke name û peynameyê endamanê HPG û YJA-Starî ser o nuşteyî, ameyê şiknayene nêyeno zanayene ke mezelî yê kamcîn endamanê HPG û YJA-Starî yê.
80 mezelan ra zafêr mezelî est bîyê la vîdeoyan de 48 hebî asenê
Goreyê çimeyanê herême verê le goristan bêro rijnayene, tewr kêm 80 mezelê endamanê HPG û YJA-Starî goristan de est bîyê la vîdeoyê ke ajansê ma girewtê, înan de 80 hebî mezelî nêasenê. Reyna goreyê vîdeoyanê ajansê ma û çimdarîyê herême 48 mezelî goristan de asenê. Seba le herêma ke goristan tede yo, hetê eskeran ra yeno taqîbkerdene, tu kes nêeşkeno şêro mîyanê goristanî û hûmarêka zelale ya goristanî nêvejîyeno orte.
