Şanoger Mehmet Emîn Yalçinkaya serrgêra koçê xo ya 7. de tirba xo ser o ame vîrardene.
Şanoger Mehmet Emîn Yalçinkaya ke 11ê tebaxa 2018î de riyê nêweşîya kanserî ra cuya xo vîndî kerdbî, tirba xo ya Goristanê Yenîkoyî yê Amedî de hetê şanogeran ra ame vîrardene. Endamê Şanoyê Şaristanî yê Amedî, Sereka Dayîreyê Kultur û Karanî Komelî ya Şaredarîya Amedî ya Şaristanê Girdî Zeynep Yaş û keyeyê Yalçinkaya beşdarê vîrardişî bîyê.
Tirba ey ser o fatîha ameyê wendene û rêze ameye girewtene. Şanoger Ozcan Ateş vîrardişî de qisey kerd û behsê cu û kaykerîya serkewta ya Mehmet Emîn Yalçinkayayî kerd û vat ke xeylê xeyalê Yalçinkayayî nêmcet mendê û ê do ê xeyalanê ci bîyarê ca. Ozcan Ateşî dîyar kerd ke Mehmet Emîn Yalçinkaya do nêro xovîrîrakerdene û wesîyetê Yalçinkayayî ser o serrgêra 7. ya koçê ey de nameyê ey salonêka şanoyî ya Şaredarîya Amedî ya Şaristanê Girdî rê ame dayene.
Sereka Dayîreyê Kultur û Karanê Komelî ya Şaredarîya Amedî ya Şaristanê Girdî Zeynep Yaş zî qisey kerd û hunermend Yalçinkaya ard vîrî û vat ê do wayîrê ked û têkoşînê Yalçinkayayî yê kultur û hunerê Kurdkî vejîyê.
Beşdarê vîrardişî gul û çîçegî tirba ey ser o ronayî û programê vîrardişî qedîya.
