Cizîr de rixmê heme astengî û dorpêçê polîsan zî sîyasetmedaran û şar bi girseyî rayîrşîyayîş organîze kerd û tezîyeya endamê HPG’yî Ferhat Tunçî zîyaret kerd.
Qezaya Cizîre ya Şirnexî de seba endamê HPG’yî Ferhat Tunç (Xebat Goyî) tezîye ameye ronayene. Roja merasîmê ceneza ra polîsî tezîya asteng kenê. Parlameneterê DEM Partî Salîha Aydenîz, Zeynep Odûncû Kûtevî, Sebahat Erdogan Saritaş, Newroz Ûysal Aslan, Kamûran Tanhan, Mehmet Zekî Îrmez û bi seyan welatijê ke vernîya awanîya DEM Partî ya Cizîre de kom bîyê, bi vatişê slogananê, “Şehîd Namirin”, “Bê Serok jîyan nabe” rayîrşîyayîş organîze kerd û tezîye zîyaret kerd.
Her çend polîsan waşt vernîya rayîrşîyayîşî zî bigîro, girse vera polîsan reaksîyon mojna û goş nêda polîsan. Girse dorpêçê polîsan şikit û rayîrşîyayîşê xo kerd. Dima ke girse nêresa keyeyê tezîya yê taxa Nûrî seba cangorîyanê azadîye deqîqeyêk rêze ameye girewtene.
‘Polîsî Cizîr de reyna provokasyonan dima yê’
Rêzgirewtişî ra pey Parlamenter Salîha Aydenîz da zanayene ke polîsî Cizîr de wazenê provakasyonan bikerê û wina qisey kerd: “Ma seba tezîyeya şehîdê xo ameyê tîya. La ma vînenê ke Cizîr de wazenê provakasyon bikerê. Wezaretê Zereyî û Walîtîya Şirnexî vanê tezîyeya xo ronê la ewleyîya Cizîrî kamca ra emir gêno ke wazeno şarê ma provake bikero. Şarê Botanî her tim xover dayo û ewro zî seba erjanê xo xover dano. Seba ke nê erjî bîyê roşnîya na komele û ewro bi saya înan prosesêkê aştî ameyo destpêkerdene.”
Aydenîz ra pey maya Tunçî Rihan Tunç zî qisey kerd û vat ke ê seba serweşî şarê kurd û Rayberê Şarê Kurd rê wazeno.
Qiseykerdişan ra pey duayî ameyê wendene û dima zîyaretê tezîye qedîyaye.
