Rojhelatê Derayî de grûbêka çekdarê girêdayeyê hukmatê Şamî yê demkî yî hêrişê karwanê hetkarî kerd û 7 kesî remnayê.
Hêzê girêdayeyê hukmatê Şamî yê demkî hêrişê karwanê hetkarîya merdimîye ke şaristanê Ceremana ver bi Siwêda şîyêne, kerd. Hêzê çekdarî hêrişî de 7 kesî ameyê remnayene û çîyê ke ereba de yê, ê zî tirawitî.
Goreyê çimeyanê herême, grûbêka çekdare nêzdîyê bendê kontrolî yê hêzanê hukmatê demkî yê Sûrîya karwanî vindarna û erebaya hetkarî remnaye. Çimeyan dîyar kerd ke kesê ke ameyê remnayene, înan ra 3 kesî ameyê veradayene la hema 4 kesî girewte yê û nameyê înan wina yê: Abid Ebû Fexir, Fîda Ezam, Yamin Memdoh El Sehnawî, Ridwan Zeyd El Sehnawî. Kesê ke ameyê remnayene heme Ceremana ra yê. Eyn çimeyan îfade kerd ke seba veradayîşê kesanê ke ameyê remnayene, têkilîyî dewam kenê û rayedarê hukmatê demkî îdia kenê ke çekdarê eşîran peyê na hedîse de yê.
Nêzdîyê aşmêk a karwanê hetkarîyan ê seba Siwêda, herêmanê ke binê kontrolê hêzanê hukmatê demkî de yê, uca de dorpêçkerde yê. Tewr peyên 8ê tebaxe de nêzdîyê dewa Sehwa El Qemih ê rojhelatê Derayî karwanê Heyva Sor rastê hêrişêk amebi.
