Alozîya awe ya Hesekî de 5 serrî yo dewam kena, hîna zî Dewleta Tirkî awa stasyonê Elokî ya ke Serêkanî ra yena Hesekî, birna. Seba na yewî ra zî zêdeyêr mîlyonêk û nêm şarê Hesekî û Til Temirî bê awe mendî û zorîya germaya hamnanî na rewşa bêawî de vîyarnenî.
Hesekî ya kantonê Cizîre de şar zorîya rastkerdişê awa şimitişî ancenî. Bi ameyîşê hamnanî cinî û domanî her kesî ra zêdeyêr zorîyê rojaneyî yê rastkerdişê awa şimitişî ancenî. Na pirsgireke 5 serrî yo dewam kena. Dima ke Dewleta Tirkî Serêkanî îşxal kerd, awa stasyonê Elokî serê Hesekî û Til Temirî birna, coka pirsgireka bêawî dest pê kerd. O wext ra pey rastkerdişê awa şimitişî bîyo erka tewr zore ya sîvîlan.
Domanî û cinî zehmetî ancenî
Goreyê xebera ANHA’yî Taxa Mişêrfê ya Hesekî de na germaya hamnanî de domana bi nameyê Xatûn El Hemed, bi waya xo ya 8 serrî Rîhamî reyde rêza derge ya cinî û domanan de vinderteyî ya. A serê depoyêka awe ya ke hetê yew rêxistinî ra taxa de ameya ronayene de vinderteyî ya û pawena ke doreyê xo ya dekerdişê bîdonê awe de bêro.
Xatûn û Rîham ke do bi seetan rêz de vindenî, seba ke yew bîdonê awe dekerî, neçar ê ke bi zorî o bîdono ke goreyê emrê înan zaf giran o, biresnî keye.
Rojnamegerî nê 5 serrî yo ke dîmenanê domananê ke barê awe binî de yê sey Xatûn û waya aye, belge kenî. Hîna zî komelê mîyanêneteweyî û sazîyên têkildarî bêveng ê.
Cîyayê domanan ra cinîyê Hesekî zî eynî zorîyan ancenî. Cinîya bi nameyê Nûrîya El Debî ya 70 serrî ya û roşnîya çimanê xo vîndî kerda, keyeyê xo yê ke kîlometreyêk ra zêdeyêrî dûrî yo ra ameya û sey Xatûnî rêza awe de vinderteyî ya.
Demo ke doreyê aye yeno û awe dekera, şênîyê taxî hetkarîya aye kenî. Her yew bîdonê aye yew çendî ra ver şinî heta ke maya 70 serrî awe resnena keye.
Goreyê qanûnê mîyanêneteweyî birnayîşê awe serê şarî ra sûcêko şerî yo. Ê ke tewr zaf nê şerî ra zirar vînenî domanî û cinî yî. Hamnanî de na zorî çend qat dubare bena. Hîkayeyanê rastkerdişê awe bîyî beşêk rojaneyî yê Hesekî.
