Mudirîya Xizmetanê Ciwanan û Sporî ya Şaredarîya Peyasî, bi paştdayîşê Klûbê Sporî yê Oz Kayapinarî, dewa Asikan de Şayîya Sporî ya Domanan viraşt. Armancê na şayîye o bi ke domanî bi sporî kêfweş bibê û rojêka weşe bivîyarnê.
Şayîye de desê pifkerde ra hetanî trambolîn, potayanê basketbolî ra hetanî kayanê zîhn û qabîlîyetî, zaf fealîyetê cîyayî estbîyê. Bi nê fealîyetanê kêfînan, domanan hem bi aktîvîteyanê fîzîkîyan enerjîya xo eşte teber, hem zî bi kayan zerrîweşîye kerde. Şayîye fersend viraşt ke domanî sporî nas bikerê û têkilîyanê xo yê sosyalî xurtêr bikerê.
Dewijî û domanan seba nê fealîyetî kêfweşîya xo arde ra ziwan û Şaredarîya Peyasî rê sipas kerd. Welatijan waşt ke şayîyê winayin dewam bikerê û wina va: “Rojê sey nê, enerjîya domananê ma vejenê teber û dewa ma kenê kêfweş. Kêfweşîya ke çimanê domanan de asena, her çî îfade kena. Wa şayîyî domdarî bibê.”
Şaredarîya Peyasî zî eşkera kerd ke do fealîyetanê winayin ê ke domanan û sporî anê têhet, dewam bikerê.
