Festîvala Kulturê Kurdan a Mîyanneteweyîye ya 33yîne 13ê êlule de, Dortmund de do bêra kerdene. KCDK-E û TJK-E bi eşkerayîyêke venga pêro kesan da ke wa tewrê festîvale bibê.
Festîvala Kulturê Kurdan a Mîyanneteweyîye ya 33yîne 13ê êlule de, Dortmund de do bêra kerdene. KCDK-E û TJK-E bi eşkerayîyêka hempare venga pêro kesan da ke wa tewrê festîvale bibê.
Eşkerayîye de dîya zanayene ke festîvale do bi şîarê ‘’Rayberîya Azade û Komelê Demokratîkî reyde ma festîvala xo fîraz bikerê, kulturê xo bipawê’’ bêra fîrazkerdene. Eşkerayîye de ame îfadekerdene ke festîvale de azadîya Rayberê Şarê Kurdî Abdullah Ocalan do bêra waştene û her hetê dinya ra xeylê kesî do tewrê festîvale bibê.
Aktîvîteyê cîya-cîyayî bêrê kerdene
Eşkerayîye de wina ame vatene: ‘’Festîvala Kulturê Kurdan do biba platformê vera kolonyalîzmî û asîmîlasyonî û îradeyê kurdan ê seba wayîrvejîyayîşê kultur û huqûqî berz bikera. Festîvale de kesayetê namdar, temsîlkarê sendîkayan û sîyasetmedarî û endamê Înîsîyatîfê Abdullah Ocalanî rê Azadîye yê Afrîka, Kanada û Ewropa do bibê meymanê ma. Warê festîvale de pêramotişê kincanê kurdan, standê xebatanê hunerî do cabigêrê û aktîvîteyê cîya-cîyayî bêrê kerdene. Amadekarîyî temam ê. Ma venga pêro şarê xo, şorişgêran, demokratan û pawitoxanê aştîye danê ke bi kincanê xo yê neteweyîyan tewrê festîvale bibê.’’
