Hemsereka DAD’î Kadrîye Dogan dîyar kerd ke “Komelê demokratîk, aştî û entegrasyonî” mifteyê çareserîye yo û wina va: “Ganî komel nê esasî de xo rêxistin bikero û waştişanê xo bîyaro ziwan.”
Elewî ke vîyarte ra heta ewro nêameyê qebûlkerdiş, bi vengdayîşê “Aştî û komelê demokratîkî” yê Rayberê Şarê Kurdî Abdullah Ocalanî ke 27ê Sibate de kerd dima, hêvîya înan awan kerd. Hemsereka Komeleya Elewîyan ê Demokratîke (DAD) Kadrîye Dogan derheqê prosesî de jinnewsî rê ercnayîş kerd.
Kadriye Dogan dîyar kerd ke coşê mîtîngê aştîye ya Kadikoyî de baş nêdîya û va ke sebebê nê zî qelsîyê xebatan bîyo. Kadriye Dogan wina va: “Mîtîngê 1ê Êlule yê Kadikoyî ganî sewîyeya coşê ey zêde bîne. Tirkîya prosesêk muhîm ra derbaz bena. Verê ma de prosesêk muhîm est o. Nê semedî ra nê esasî ser o ma xo rêxistin bikerê û xebatan bikerê.”
‘Ganî komîsyon pêro hetan goşdarî bikero’
Kadrîye Dogan dîyar kerd ke ganî komîsyono ke meclîs de ameyo awankerdiş, wezîfeyê xo bica bîyaro û ganî Rayberê Şarê Kurdî Abdullah Ocalan bêro goşdarîkerdiş. Kadrîye Dogan wina dewam kerd: “Ganî hetê komelî bêrê goşdarîkerdiş û waştişî cidî bêrê girewtiş. Nêvînaye nêbê. Ganî rastî bêrê vînayîş. Pêşnîyazîyê ma o yo ke vatişê Birêz Ocalanî baldar bêrê girewtiş û baş bêro famkerdiş. Ganî komîsyon pêro hetan goşdarî bikero. Ganî polîtîkayê asîmîlasyonî peynî bibê.”
‘Ganî ma yewbînan fam bikerê’
Kadrîye Dogan dîyar kerd ke komel heta ewro nêweş ameyo û ganî tîya ra tepîya nêweş dewam nêkero û wina va: “Nê prosesî de wezîfeyêk muhîm keweno milê ma ser. Bi hezaran serran o bi serkêşîya cinîyan ma têkoşîn kerd. Nika yewine waştiş aştî û cuya hempar a. Ganî ma yewbînan cîya nêvînê û yewbînan fam bikerê.”
