Komîsyonê Perwerdeyî, Komîsyonê Gedeyan û Komîsyonê Ziwan, Kultur û Hunerî yê DEM Partî, derheqê serdemo newe yê perwerdeyî û problemê ke yenê ciwîyayene Merkezê Pêroyî yê DEM Partî de eşkerayî daye û dîyar kerd ke na serre zî bi mîlyonan domanê Kurdî bi ziwanê dayîka xo perwerde nêgênê.
Komîsyonê Perwerdeyî, Komîsyonê Gedeyan û Komîsyonê Ziwan, Kultur û Hunerî yê DEM Partî, derheqê serdemo newe yê perwerdeyî û problemê ke yenê ciwîyayene Merkezê Pêroyî yê DEM Partî de eşkerayî daye. Eşkerayî de Cemîle Turhalli Balsak qisey kerd.
Eşkerayîya komîsyonan wina ya:
“Şarê ma yo erjîyaye, şima bi xeyr ameyî, ser û çiman ser ameyî. Ma zî sey Komîsyonê Ziwan, Kultur û Hunerî akerdişê perwerdeyî ser o wazenê çend qalan vajê. Ma na daxuyanîya xo Komîsyonê Gedeyan û Komîsyonê Perwerdeyî reyde kenê. Nika dibistanî abîyenê. Çi heyf ke na serre zî bi mîlyonan domanê Kurdî bi ziwanê dayîka xo perwerde nêgênê. Dest bi dibistanî kenê la çi heyf o ke nê dibistanî de bi ziwanê xo perwerde nêvînenê.
Zafziwanîye şaran rê aştî arda
Ma vanê eke seserra komare nika ra pey demokrasî wazeno, eke seypêyîya şaran wazeno, eke aştî wazeno helbet ganî aştî bi ziwanan, mabênê ziwanan de ganî dest pê bikero. Raşt a ziwan heqê şaran o, heqê qedeyan o. Eke yew gede nê heqî ra mehrûm bibo xo tewirê ê şarî nêvîneno. Bingeyê ey, psîkolojîya ey ê cayî qebûl nêkeno. Dinya de nimûneyî zaf est ê. Ma her ca de vînenê ke dewletanê desthilatdaran hemeyan de gedeyî bê ziwanê xo dest bi perwerdeyî kenê. No şîdet o, tundîyêko xirab o. Çike ma vanê ke merdim bi heqano xo merdim o. O çax ganî merdim bi girewtişê heqanê xo ganî dest pê bikero. Se serre ra heta a nika ma vat ma na neheqîy bidê weda. Ma reyna vanê eke dinya de zafziwanîye est ba holî est a, eke dinya de perwerdeyê zafziwanî est bo weşîye est o, eke dinya de perwerdeyê zafziwanî est bo seypêyîye û têhetameyîş est o, aştî est a. Zafziwanî aştî ardo şaran rê. Zafziwanî weşîye ardo heme şaran rê. Înkarî xirabî ardo. Dewletê neteweyî neheqîya xo ziwanî ser o zaf zêde kerdo. Ma wazenê nika ra pey komara demokratîk bi aştîya ziwanan înşa bikerê. Amancê ma no yo.
Ewro dibistanî dest pê kenê. Ma heme gedeyan, ciwanan rê weşîye wazenê. Ma wazenê ke ameyoxê ma wa bi statuyê ziwanan bibo. Eke şima statu bidê ziwanî, şima seypêyî bidê ziwanî şima eşkenê aştî zî zaf rehet înşa bikerê. Ma hesretê aştî yê, ma hesretê ziwanê xo yê, ma hesretê heqanê xo yê. Ma seypêyîya ziwanan bîyarê. Ma bi keda xo, ma komelî mîyan de her ca de ma piştgirîya xo bidê yewbînan, wa dewlet na polîtîkaya cîyaker ra fek verado, wa merdim her ca de bi ziwanê xo, bi heq û hiqûqê xo, xo endamê nê şarî bivîno. Seba aye na serdema perwerde ma hemînan ra aştî û weşîye bîyaro. Spas kena.”
