Federasyonê Elewîyan o Demokratîk (FEDA) û Yewîya Cinîyan ê Elewîyanê Demokratîkan (DAKB) bi mûnasebetê serrgêra darbeyê leşkerî yê 12ê êlûle 1980î de beyanatêk da.
Beyanatî de ame vatene ke darbe bi zordestî û îşkenceyanê vera karker, şorişger, demokrat û bi taybetî kurdan û elewîyan vîrê şarî de mend a.
Prosesê 12ê Êlûle de se hezar kesî ameyê eşkerakerdene, bi des hezaran tepîşîyayî, bi îdam, îşkence û koçê mecburî şar bedêlê giranî dayî. Zordestîya vera bawerîya elewîyan, dewan de bi zorî viraştişê camîyan û dersê dînî yê mecburî bi sîyasetê asîmîlasyonî tatbîq bîyî.
“Zîhnîyetê yewrengî dewam keno”
FEDA û DAKB’yî dîyar kerd ke mîrasê darbeyî “zîhnîyetê yewrengî” ewro zî dewam keno. Tayînkerdişê qeyûman ê weçîniteyan ser o, qebulnêkerdişê cemxaneyan sey cayê îbadetî û qedexekerdişê kurdkî nîşaneyê ney ê.
Beyanatî de wina ameyo vatene: “Nê pêro nîşaneyê tewr eşkera yê ke zîhnîyetê 12ê Êlûle hema zî dewam keno.”
Vengdayîşê aştî muhîm o
Beyanatî de îfade bî ke vengdayîşê aştî û komelê demokratîk yê Rayberê Şarê Kurdî Abdullah Ocalanî zaf muhîm o.
FEDA û DAKB’yî vat: “No vengdayîş tena seba şarê kurdî ney, seba ke heme şarî, bawerî û elewîyî seypê û azad biciwîyê rayîr mojneno. Seba ke aştî, wayûbirayî û demokrasî awan bibo ma do têkoşînê xo bidomnê. Çunke ma zanê ke azadî, cuyêka komelkî de ke bi riza ameyo ronayene; aştî zî sîstemêk de ke şar ziwan, nasname û bawerîyanê xo azadane eşkeno îfade bikero, do bibo rastikêne.”
