Herêma Vakur û Rojhelatê Sûrîye de do 713 hezar û 554 wendekarî, 3 hezar û 647 dibistanan de dewrê neweyî de bi kurdkî, erebkî û suryankî dest bi perwerdeyî bikerê.
Serra perwerde û musnayîşî ya 2025-2026î Herêma Vakur û Rojhelatê Sûrîye de do 14ê Êlule de bi 3 ziwanan dest pê bikera. Goreyê malumatanê ke Hemsereka Heyetê Perwerde û Musnayîşî yê Îdareyê Xoserî yê Demokratîkî Semîra Hec Elî daneyê Ajansê Xeberan ê Hawarî rê pare kerd.
Semîra Hec Elî va do emser 3 hezar û 647 dibistanan de, 713 hezar û 554 wendekarî û 35 hezar û 513 mamostayî dest bi serra newîye bikerê.
Semîra Hec Elî da zanayene ke çarçeweya newekerdişê mufredat û materyalanê dibistanan de, înan mîlyonêk kîtabî çap kerdê û her kîtabê înan ra yew zî do sey 3 kopyayanê cîyayan bêro çapkerdene û wina va: “Pêroyî de do 4 mîlyonî kîtabî bêrê çapkerdene. Materyalê ke ameyî newekerdene, bi ziwananê fermîyan ê herême, yanî bi kurdkî, erebkî û suryankî ameyî amadekerdene. Emser do qismo dîyin ê materyalanê rastkerdeyan bêro dayene ke bala anceno ser averberdişê fikrê rexneyî, perwerdeyê sîvîlî, zanistî û ziwanî. Heqê her domanêkî/e est o ke bi ziwanê xo yê maye bimuso.”
Semîra da zanayene ke 95 dibistanê ke koçberî tede ameyî cakerdene, hewna nêameyî vengkerdene û nê malumatî dayî: “Tebqa de 32, Cizîre de 32, Reqa de 31 dibistanan de koçberî ameyî cakerdene. Seba înan zî xebatî yenê rayraberdene.”
