Akademîsyeno îranij Hamîd Dabaşî piştî daye vengdayîşê Aştî û Komelê Demokratîkî yê ke Rayberê Şarê Kurdî Abdullah Ocalanî ke 27ê sibate de kerd.
Dabaşî ke Unîversîteya Columbîa de Profesorê Xebatanê Îranî û Edebîyatê Muqayeseyî yo, mesajo ke DEM Partî rê erşawit, tede vengdayîşê Abdullah Ocalanî sey “Gama tewr şorişgir” pênase kerd.
“Gamêka şorişger û samîmî”
Dabaşî mesajê xo de wina vat:
“Dostê erjîyayî. Beyanatê tarîxî yê Ocalanî ke tede vengdayîşê çareserîya demokratîke û aştîyane yê meseleyê kurdî kerd, bi şayîyêka girse ez musaya. Goreyê mi no mojnayîşê resayîşêko sîyasî yo ke dinya de kêmî aseno! Nê gamê sîyasî yê bihîkmet erzîyayî, bingeyê exlaqî, tena meseleyê kurd û tirkî rê ney, seba ameyoxê herême zî tesîrêko derg û mende virazeno. Goreyê mi na game, demê pêkewtişan de de gama tewr şorişger û tewr samîmî ya ke lîderêko sîyasî yê hîkmetdar eşkeno bierzo.”
Hamîd Dabaşî kam o?
Hamîd Dabaşî dostanê nêzdîyan ê Edward Saîdî ra yo û Amerîka de entelektuelanê muxalîfan ê pêşengan ra yew o. Waranê xebatanê Îranî, Îslamî, sînemaya dinya û edebîyatê muqayeseyî de 20 ra zêdeyêr kitabê ey est ê û eserê ey açarîyayê gelekî ziwanan. Xebatê akademîkî ra vete, zaf reyî beşdarê konferansanê mîyanneteweyîyan bîyo û New York de ciwîyeno.
