Mudîrîya Kultur û Karê Komelkî ya Şaredarîya Peyasî, Merkezê Kreş û Miqatekerdişê Rojane yê Zarokîstanê Perperike de ke xizmeta zafziwanî dana, dest bi perwerdeyê serra newîye kerd.
Dima ke Zarokîstanê Perperike dest bi perwerdeyê serra newîye kerd, ewro zî Merkezê Kreş û Miqatekerdişê Rojane yê Zarokîstanê Perperike seba perwerdeyê 2025-2026î berê xo akerd. Bi akerdişê perwerdeyê serra newîye reyde Hemşaredarê Peyasî Bêrîvan Gulşen Sîncar û Cengîz Dundar, Hemşaredarê DEM Partî yê Peyasî, Hemşaredarê Bajarê Neweyî Mehmet Ergun, Îdarekarê Sendîkaya DÎSK Genel-Îşî û xeylêk dayîk û pîyê domanan amade bîyê.
‘Waştişî zêdîyayê, hewcedarî bi kreşanê neweyan est a!’
Hemşaredare Bêrîvan Gulşen Sîncar merasîmê akerdişî de qiseykerdişê xo de va: “Dima ke ma ameyî wezîfe ser, ma seba ke dezgeyanê ke hetê qayûman ra ameybî girewtene ya zî betal ameybî veradayene newe ra akerê, bi hawayêkê xurtî dest bi xebatan kerd û akerdî. Nê çarçewe de, ma serra vizêr Zarokîstanê Perperike newe ra akerde. Domanê ma tîya, reyde ziwanê tirkî û îngilîzkî, firsendê musayîşê ziwanê xo yê dayîke, bi ziwanê kirmanckî û kurmancî zî vînenê. No yew perwerdeyê înan ê ameyoxî de bi perspektîfêkê zafziwanî do dewam bikero.”
Hemşaredare Sîncar ard ziwan ke waştişêko zêde est o û seba naye ê do seba akerdişê merkezanê neweyan dest bi xebatan bikerê.
‘No xizmet seba ameyoxî yo!’
Hemşaredar Cengîz Dundar zî akerdiş de qiseykerdişê xo de wina va: “Ma tîya xebatanê ke waranê kultur, huner û psîkolojî de seba averşîyayîşê domanan paştî bidê, kenê. Mamosteyê ma yê pisporî warê drama, hunerê vîzyonelî û muzîkî de est ê û karanê xo de zana yê. Ma wexto ke xizmet kenê, bi hawayêkê ke ziwanê dayîke esas bêro girewtene û goreyê çarçeweya zafziwanîye hereket kenê. No xizmet zî seba ameyoxê domananê ma yo.”
‘Xebatî do zafziwanî bibê!..’
Derheqê xebatanê ke yenê kerdene de, Mudîrîya Karanê Kultur û Hunerî zî wina va: “Merkezê Kreş û Miqatekerdişê Rojane yê Zarokîstanan de, seba domananê 3-6 serrî, goreyê çarçeweya perwerdeyê verê dibistanî de seba ke qabîlîyetanê xo aver berê xebatî yenê kerdene. Domanî nê çarçewe de atolyan de perwerdeyê drama, muzîk, şano, felsefe, tebîet, spor û hunerî gênê. Xebatê ke merkezanê Zarokîstanan de yenê kerdene, bi hawayêkê zafziwanî mîyanê hewteyî de mabênê saetanê 08:00 û 17:00î de fayde gênê. Nika kreş de 120 domanî qeydkerde yê û 20 mamosteyî û xebatkarî bi fedakarîyêka pîle seba averşîyayîşê înan xebitîyenê. Perwerdeyê zafziwanî yê Zarokîstanî ewnîyayîşê domanan ê dinya keno hîra û firsendê şinasnayîşê kulturê cîyayî dano. Ma sey şaredarî û Mudîrîya Karanê Kultur û Hunerî, xebatanê seba zêdînayîşê hûmara nê dezgeyanê ercîyayeyan dewam kenê. Xebatê pîlkerdişê nê projeyî ke ameyoxê domananê ma yo, do bêvindertiş dewam bikerê.”
Akerdişê Merkezê Kreş û Miqatekerdişê Rojane yê Zarokîstanê Perperike, dima ke hetê hemşaredaran û mamosteyan ra xelatî domanan rê ameyî vilakerdene, qedîya.
