Çarçewaya Forûmê Aştî û Azadîya Komelkî de konsero zafziwanî ame organîzekerdene. Konserî de hêvîya şarê Kurdî, Bask, Îrlanda û Kalabrîyayî vejîya vernî.
Çarçewaya Forûmê Aştî û Azadîya Komelkî ya ke mabenê 12-16ê Gulane de hetê Şaredarîya Amedî ya Şaristanê Girdî ra ame organîzekerdene Qonaxê Cemîlpaşa de konserê bi nameyê ‘Vengê Vîrî: Muzîkê Kurdkî, Bask, Îrlanda û Kalabrîyayî de Şîn, Xoverdayîş û Hêvî’ ame organîzekerdene. Hemserekê Amedî yê Şaristanê Girdî Serra Bucak, Dogan Hatun û xeylî welatijî beşdarê konserî bîyî.
Konserî de, cografyayanê cîyayan ra hunermedî vejîyayî sahne ser; deyîrê ke vîrî şînî û hêvîyanê şarê Kurdî, Baskî, Îrlandî û Kalabrîyayî anê ziwan, bi beşdarbîyayîşê welatijan ravurîya koroyêka girde yê paştîdayîşî. Konserê zafziwanî de mesajê hempar ê aştî amê dayene, heme muzîkjenan bi ziwanê dayîka xo deyîrî vatî, konser bi coşêko gird qedîya.
