Psîkolog Murat Burtakuçînî bale ante ser ke şaristananê Kurdîstanî de şuxulnayîşê madeyî zêdîyayo û va: ”Bi xebatanê pawitiş û vergirewtişî çew eşkeno ciwanan şuxulnayîşê madeyî ra bifîno dûrî.”
Kurdîstan şuxulnayîşê madeyê narkotîkî çend şino zêdîyeno. Rîyê polîtîkayê şerê taybetî ra pabestîyîya madeyê kungkerdişî hem zêdîyena hem zî hem serrê kesanê ke şuxulnenê çend şino yenê war.
Merkezê Perwerde û Paştdayîşî yê Pabestîyeya Madeyî yê Şaredarîya Amedî ra Psîkolog Murat Burtakuçînî derheqê babete de ANF’yî rê qisey kerd.
Şaredarîya Şaristanê Girdî ya Amedî aşma teşrîna peyêne ya 2024î de Merkezê Perwerde û Paştdayîşî yê Pabestîyeya Madeyî akerd.
Psîkolog Murat Burtakuçînî bi taybetî bale ant muhîmîya gamanê pawitiş û vergirewtişî ser û va: ”Pabestîyeya madeyî têna meseleya şexsî nîya, meseleyêka komelkî ya. Seba ke ma ciwananê xo pabestîye ra dûrî tepişê berpirsîyarîya pîle kewna milê keyeyan, taxan û komelî. Ma bi xebetanê atolyeyeyan ê semedê qijan û roniştişanê psîko-perwerdeyî hedef kenê ke hem zanayîş bidê hem zî hîsgêrîye biafirnê.”
Murat Burtakuçînî ard ziwan ke polîtîkayê şerê taybetî yê ke Kurdîstan de yenê rayraberdene verê şuxulnayîşê madeyî akenê û va semedê çareserîye paştdayîş, zêdîyayîşê hîsgêrîya komelkî hewce keno.
