Serekê Meclîsî Numan Kurtulmûşî kombîyayîşê komîsyonî yê 12. de vat ê do wextê kilmî de raporêkê zixmî yo ke pawitişanê demokratîkbîyayîş û dewleta huqûqî rê bibo cewab, teqdîmê meclîsî bikerê.
Serekê ORSAMî Dr. Kadir Temizî ard ziwan ke sîyaseto global merhaleya vîyartîşî de yo û vat seba ke proses bêro domnayene ganî rayapêroyîye yê Tirkîya, Iraq û Sûrîye rê xerîtaya rayîrî ya zelal bêro teqdîmkerdene.
Serekê Cigêrayîşê Genarî Îhsan Aktaşî zî ard ziwan ke komîsyon ganî verî meseleyanê huqûqî rê eleqedar bibo û vat: ”Qanûnê bingeyî yo newe û vîzyonê demokratîkbîyayîşî yo hêzdar do xeylê mesleyan bi xo çareser bikerê.”
Temsîlkarê EKEAVî Tarik Çelenkî zî îfade kerd ker meseleya kurdan têna ya Tirkîya nê, meseleya Rojhelatê Mîyanênî ya û vat: ”’Konseptê Ocalanî eşkenê xizmetê haştîye bikerî. Ganî hetê kurdan û tikra konseptanê haştîye biafirnê. Demokratîkbîyayîşê Tirkîya semedê şaranê Rojhelatê Mîyanênî eşkeno bibo nuqtaya vejîyayîşî. Ganî komelo sîvîl dahîna zaf bibo tewrê prosesî. Ganî hîkayeyê hemparî bêrê nuştene, sînorê cografî bêrê wedaritene.”
Serekê Meclîsî Numan Kurtulmûşî qefilnayîşê kombîyayîş de qisey kerd û nê vatî: ”Ma mabênê destpêkerdiş û nûqtaya ke tede yê de ferqê girdî vînenî. Ma do nê prosesî dewrê tewr kilmî de temm bikerê û raporêkê zixmî yo ke do pawitişanê demokratîkbîyayîş û dewleta huqûqî rê bibo cewab, teqdîmê meclîsî bikerê. Prosesî rê sera 75 paştdayîşo komelkî est o. Waştişo bingeyî yê hemwelatîyanê ma yê kurdan o yo ke derheqê nasname de wa teredutê înan werte ra bêrê wedaritene. Hîsê înan ê aîdîyetî xurt ê, no temînatê ma yo tewr gird o. Ma eşkenê zaf qisey bikerê la çîyo esas o yo ma îradeyê roşanîyîşê ameyoxê hêzdarî ramojnê.”
Kombîyayîşê bînî yê komîsyonî de do dezgehê cinîyan û ciwanan bêrê goştarîkerdene.
