Sazgehê demokratîkî û Platformê Ked û Demokrasîyî yê Amedî, vera cezayanê dardakerdişî yê dewleta Îranî amadekarîya çalakîyêka nîşandayena nêrazîbîyayîşî kenê. Sazgehan vengdayîş de aşkera kerd ke ganî kes vera nê barî bêtêkoşîn nêmano.
Platformê Ked û Demokrasîyî yê Amedî û Sazgehê Demokratîkî yê Amedî, vera tewrê dardakerdişanê ke nê rojanê peyênan de Îran de vera kurdan tayêna bîyê zêde û tewqîfkerdenê ke vera sîyasîyan yenê kerdene ser vengdayîşê çalekîye kerd.
No semed ra yew afîş ame parekerdene. Parekerdene de sazgehan bi sloganê “Vera dardakerdişanê ke Îran de yenê kerdene vajê vinde!” û “Bêveng memanê, vera dardakerdişan vengê xo vejê!” Seba azadîye û heqanê merdimatîye, heme şarê Amedî dawetê Meydanê Şêx Saîdî ame kerdene.
Pêzanînê Çalakîye wina yê:
-
Cayê Çalakîye: Amed, Berê Koyî-Meydanê Şêx Saîdî
-
Tarîx: 3ê Hezîrana 2026an (Çarşeme/Ewro)
-
Saet: 18:00
Sazgehê amadekarî dîyar kenê ke seba şiknayîşê nê bêtêkoşînî û bêvengîye, ganî her kes nê meydanî de amade bo û vengê xo berz biko.
