Wendekarê wendegê amadekarî yê şaristanê Kobanê bi coşêko gird dest bi serra newîye kerd. Wendekarê ke 12 serrî yo ziwanê xo yê dayîke de perwerde dîyenê, vanê: “Ziwan, kultur û tarîxê xo de perwerde dîyayîş şans û fersendêko gird o.”
Wendekaranê Vakûr û Rojhelatê Sûrîye, 14ê Êlule de dest bi serr a perwerdeyî û musnayîşî ya 2025-2026î kerd. Bi hezaran doman û ciwanê ke ziwanê xo yê dayîke de perwerde dîyêne, bi coşêko gird şinê wendegeh. Şaristanê Kobanê yo ke bi Kantonê Firatî girêdayî yo û nufusê ci pêro kurd ê, wendegeh û materyalî bi kurdkî yê. No sebeb ra, qismê perwerdeyî de sinifa yewine ra heta daraxê zanîngehî tesîrê ziwanê dayîke yê kurdkî est o.
12 serrî yo perwerdeyê kurdkî vînena
Meryana Enza ke Wendegehê Şehîd Hogirî de wendekar a, ajansê JINHA’yî rê qisey kerd û va ke 12 serrî yo bêmîyan ziwanê xo de perwerde vînena, no fersendêko zaf baş o û kêfweşîya xo ana ziwan û wina va: “Ez feyzê perwerdeyî yê peyênî de ya, yanî nika mi dest bi sinifa 12. kerd. Mi zî sinifa yewine ra hetanî ewro materyalê Rayberîya Xoserî ziwanê xo yê dayîke de wendî. Ez wina fikirîna ke 12 serrî perwerdeyê kurdkî dîyayîş seba mi fersendêko gird o. Tena seba mi nê, seba pêro neslê ma, fersendêko winayin o ke neslê bînî zî bi hesret paweyê ci bîyê.”
Meryana Enza ke bala ancena heyecanê qedînayîşê wendegehî û wina domna: “Ma bi şahî û coşêko gird dest bi serra newîye kerd. Serra bêre ma do zanîngeh de dest pê bikerê û no seba mi heyecanêko cîya yo. Hîna serrêka mi est a, aye ra hema mi qerar nêdayo ke ez do zanîngeh de kamcîn beş biwana. Seba mi zanîngeh û ziwanê ma muhîm ê.”
