Heyva Sor a Kurd derheqê afatan de hîrê rojî komxebatêk viraşte û kar û xebatanê ke ganî wextê afatan de bêrê kerdene, perwerde dana.
Yewîneyê Pawitişê Sîvîlî yê Heyva Sor a Kurd, bi piştgirîya Rêxistina Medîco International, şaristanê Qamişlo de programêkê perwerdeyî yê hîrê rojan viraşt. Endamê pisporî yê şaredarî zî tede, xeylê kesî tewrê nê perwerdeyî seba afatan bîyî. Komxebate de zafêr seba meseleyanê îdarekerdişê afatan û rêbazanê lezgîn ê mudaxaleyî ser o vindertî.
Perwerdeyî do dewam bikerê
Xebatkaranê Heyva Sor a Kurd vat ke amancê na xebate, berzkerdişê astê amadekarîye û xurtkerdişêa kapasîteya ekîbanê herêmî ya. Xebatkaran dîyar kerd ke ê do nê xebatan bidomnê ke wa wextê rewşanê awarte û qrîzan de, şar bi tarzêko başêr û ewletêr bêro pawitene.
Amanc pîlkerdişê asta pisporîye ya
Na game sey parçeyêka xebatanê sazgehanê herêmî yena vînayene. Bi nê xebatan Heyva Sor a Kurd kifş kerd ke ê wazenê torra pawitişê sîvîlî vera afatanê xozayî û rewşanê awarte pîlêr û pisporêr bikerê.
