Şaristanê Eseperenza yê Hondurasî de pêvînayîşê şaranê herême û têgêrayîşanê komelkî ame kerdene û seba şarê kurdî vengdayîşê piştgirîye ame kerdene.
Mabênê 26 û 30ê êlule de şaristanê Esperenza yê Hondurasî “Pêvînayîşê Şaranê Herême yê Amerîka û Têgêrayîşanê Komelkî yê Mezoyî yê 3.” Ame kerdene. Pêvînayîş bi mêmanperwerîya Konseya Neteweyî ya Hemwelatî û Rêxistinanê Şar ê Hondurosî (COPINH) ame kerdene. COPINH hetê raybera Şarê Herême ya Lencayî Berta Cáceres ra amebi awankerdene ke serra 2016 de hetê hêzanê paramîlîteran ra ameybî qetilkerdene. Temsîlkarê têgêrayîşê kurd zî beşdarê pêvînayîşî bîyê. Panama, Kosta Rîka, El Salvagor, Meksîka û Guatemala ra xeylê delegeyî beşdar bîyê.
Pêvînayîşê de ke 4 rojan dewam kerd, qiseykerdişî ameyê kerdene, muhîmîya konfedaralîzmê demokratîk ê pêroyê dinya û rolê têkoşînê hempar ê piştgirîya mîyanneteweyî dde vejîyayê vernî. Cinîyê COPINH’î û temsîlkarê têgêrayîşê kurd ê cinî pîya atolyeya “Heta cinî azad nêbî komel azad nêbeno” organîze kerd. Atolye de cinîyan tecrubeyê têkoşînê azadîye yê cinîyan vat.
Encamname de ame dîyarkerdene ke ê paştî danê têkoşînê şarê kurd ê seba dîyarkerdişê qedera xo û “Azadîya lîdero tarîxî yê şarê kurdî Abdullah Ocalan” zî encamname de ca girewt. Beşdaran da zanayene ke Berta Cáceres kesa yewin a ke têkoşînê Rayberê Şarê Kurdî Abdullah Ocalan bi înan da naskerdene û wina vat: “Wayîrvejîyayîşê têkoşînê şarê kurdî, wayîrvejîyayîşê wesîyetê Berta yo.”
Peynîya pêvînayîşî de heme delegeyan seba paştîya şarê kurdî reyde mesajêko hempar ê bi vîdeo pare kerd.
