Koordînasyonê KJK’yî xoverdayîşê Rayberê Şarê Kurdî Abdullah Ocalanî yê 27 serran ke vera sîstemê qirkerdişî yê Îmraliyî rayra beno, selam kerd û semedê caardişê azadîya fîzîkîye ya Rayberê Şarê Kurdî veng da.
Koordînasyonê Cinîyan ê Kurdîstanî (KJK) bi wesîleya komployê mîyannteweyîyî yo ke 9ê teşrîna verêne de vera
Rayberê Şarê Kurdî Abdullah Ocalanî dîya despêkerdene eşkerayîye daye. KJK’yî veng da ke sere de cinîyî heme hetî ra semedê azadîya fîzîkîye ya Rayber Apoyî têkoşînî xurtêr bikerê.
Eşkerayîye de rayraşîyayîşê cinîyan ke bi şîarê “Ma bi hêvîye ver bi Anqara şinê” Amedî ra ver bi Anqara ame kerdene ame selamkerdene û ame vatene ke ganî çalakîyê winayênî dewam bikerê.
Koordînasyonê KJKyî vat: “Komployo ke 9ê teşrîna verêne ya 1998î de bi îtîfaqê leyminî yê mîyanneteweyîyî dîya destpêkerdene, 27 serrî xo dima verdayî. Ma sere de xoverdayîşê bi rumetî yê Rayber Apoyî ke 27 serrî yo vera sîstemê qirkerdişî yê Îmraliyî rayra beno, selam kenê. Ma şexsê hemrayanê xo Aynure Artan û M. Halît Oralî de heme hemrayan û welatperweranê xo ke bi şîarê ‘Şima nêeşkenê tîja ma tarî bikerî’ vera komployî xo kerd helqayê çemberê adirinî bi hurmet û mînetî yad kenê. Ma soz danê ke ma do waştişê înan ê Rayberîya Azade û Kurdîstanê Azadî bîyarê ca.”
KJK’yî bale ante şerê Rojhelatê Mîyanênî ser û vat modelê netewa demokratîke ê Rayber Apoyî vera şeran panzehîr o. KJK’yî ard ziwan sîtemo ke Rojawan de ameyo înşakerdene yeno hedefgirewtene û vat no yeno manaya dewamkerdişê komployî. Eşkerayîye de bale ameye antene paradîgmaya demokratîk, ekolojîk û azadîwazîya cinîyan ê Rayber Apoyî ser û ame vatene ke cinîyî bi wayîrvejîyayîşê na paradîgma eşkenê cewabê tewr gidî bidê.
Koordînasyonê KJK’yî vat: “Prosesê haştîye û komelê demokratîkî ke serkêşîya Rayber Apoyî de yeno rayraberdene darbe da plananê leyminan ê komployê mîyanneteweyîyî ro.” Eşkerayîye de ame vengdayene ke sere de cinî û ciwanî şarî wa wayîrê prosesî bivejê.
Eşkerayîye bi nê vengdayîşî qedîye: “Ma veng danê pêro cinîyan, ciwanan, karkeran, ekolojîstan, hêzanê vera sîstemî ke wa semedê azadîya fîzîkîye ya Rayber Apoyî, semedê înşakerdişê komelê demokratîkî û vilakerdişê paradîgmaya demokratîke wa rêxistinkerdiş û têkoşînê xo xurtêr bikerê.”
