Komîteya Ekonomî ya Kongra Starî akerdişê Kooperatîfê firina Zirganî dîyarî ê cinîyanê ke 6 serrî yo Zirganî de xover danê, kerd.
Goreyê xebera JINHA’yî Komîteya Ekonomî ya Kongra Starî ya Til Temirî, 4 aşmî ra ver semedê cinîyanê Zirganî dest bi projeyêk kerdo. Proje kooperatîfê firina Zirganî ra yeno pê. Dimayê xebata 4 aşman, firinêka ke hîrê cinî tede ca gênê û nanê sîyayî û menaqîşî ke bi her tewir virazîyenê, ameya akerdiş. No proje reya ewiline Zirgan de û bi îdareyê cinîyan ame akerdiş.
Akerdişî de Îdarekara Kongra Starî ya şaristanê Zirganî Îsra Hemîd qisey kerd. Îsra Hemîd akerdişê firina Zirganî ke sey projeyê yewine yê semedê cinîyan ameya akerdiş, pîroz kerd û va: “Semedê piştdayîşê cinîyan warê ekonomî û manewî de akerdişê firinêk gamêka muhîm a. Cinîyê Zirganî şert û mercanê bêemniyetî, miyanê bombabaran û koçberîye de mendê la xover danê. Bi na game û bi na bawerîye projeyê yewine yê semedê cinîyan ame kerdiş, mojneno ke cinî eşkenê projeyanê tewr pîlan bîyarê ca.”
Bi sloganê “Jin Jîyan Azadî” û miyanê atmosferêko bi kelecan de cinîyan rîbî birnayê û dest bi viraştişê nan û menaqîşan kerd û cinîyan rê vila kerd. Atmosferê akerdişê firine û îdareyê ci zerrîya cinîyan de hêvîyêka newa viraşte.
