Hemserekê Pêroyî yê KESK’î Ahmet Karagoz derheqê rayraşîyayîşê xo yê vera bêhuquqîya KHK’yan de dîyar kerd ke ê wazenê waştişanê xo biresnî Meclîsê Tirkîyaye û Wezaretê Adaletî ra û wina va: “Seba ke ma aştî waşt, ma karanê xo ra îxrac kerdî.”
Deshilata AKP’î peynîya Darbeya 15ê Temuza 2016î bi rayîrê KHK’yan 125 hezar û 612 kedkar karîra dûrî vistî. Mîyanê înan de 4 hezar û 259 kesî endamê KESK’î bîyê. Nêzdî 10 serrî yo ke xoverdayîşê kedkaran ê vera KHK’î de domyeno. Xeylê kesan nê xoverdayîşî de cuya xo vindî kerde, tayê kesê ke cuya xo vindî kerdî, badê cû mahkeme heqê înan de qerarê agêrayîşî yê karî da. Temsîlkarê KESK’î zî vera pêroyîya nê bêhuquqîyan Amedî ra ver bi Enqereyî dest bi rayraşîyayîşî kerd.
Hemserekê Pêroyî yê KESK’î Ahmet Karagoz derheqê rayraşayîşî û waştişanê xo de ajansê ma rê qisey kerd.
Bi hezaran kesî ameyê îxrackerdene
Ahmet Karagoz dîyar kerd ke peynîya Darbeya 15ê Temuza 2016î de Desthilata AKP’î bi KHK’yan bi des hezaran ‘karkerê pêroyî’ bêhuquqî îxrac kerdî û wina va: “Heqê karkaran ê pawitişî ame astengkerdene. 152 hezar kesî ameyê îxrackerdene, kesê ke ameyê îxrackerdene, vatê; ‘ma nêzanenî çira ma îxrac kerdî?’ mîyanê kesê ke ameyê îxrackerdene de, 4 hezar û 259 kesî endamê KESK’î bîyê. OHAL vera muxalîfan bikar ardî, ma ne hetê cemaetî ne zî darbeya AKP’î de ca girewtî, ma her dem vera înan de vindertî. Seba naye zî ma karî ra dûrî vistî.”
‘Bi xoverdayîşî %52 embazê ma agêrayê karê xo’
Ahmet Karagoz ard ziwan ke tay embazê înan ke karî ra ameyê vetiş û surgunkerdiş bi xoverdayîşî agêrayê karê xo û wina domna: “Nê 10 serrî yo ke ma têkoşîn danî, ewro 2 hezar embazê ma agêrayî karê xo ser. Seba agêrayîşê karê xo, ma 13ê Citmenge de Amedî ra dest bi rayraşîyayîşî kerd. Ma do hetanî Meclîs û Wezaretê Adaletî ra do rayra şîrî. Komîsyono ke ewro ameyo awankerdene game bierzo, do aştî pê bêro û ma zî do biagêro karê xo. Ma hetanî ewro bi xoverdayîşê xo ameyî nê rojan, nika ra pey zî ma do wina xoverdayîşê xo do bidomnî. Xoverdayîşê aştîye do dewam bikero.”
