Koma Amed 30 serrî ra pey do Amed de konserêk organîze bikera. Koma Amed Stenbol de dest bi amadekarî yanî provayê konserî kerd. Yeno pawitene ke des hezar kesî beşdarê konserî bibê.
Koma Amed 30 serrî ra pey do Amed de roja şeme (25ê teşrîna verêne) konserêk bikera. Konser do Meydanê Newroze yê Amedî de bêro kerdene. Koma Amed komanê kehen ê Merkezê Kulturî yê Mezopotamyayî ya. Koma Amed dima ke Ewropa de dest bi konseran kerd, na rey zî verê dano vakurê Kurdîstanî. Konser do bi sloganê “Kulîlkên Azadîyê Pêşwazîya Aştîya Civakî Dikin” bêro kerdene.
Amadekarî dewam kenê
Konser bi hemkarîya Sanatça Organîzasyon, Şaredarîya Amedî ya Şaristanê Girdî û Şaredarîya Peyasî yeno kerdene. Seba konserî Amed de amadekarî dewam kenê. Xeylê bîlboardanê merkezê şaristanî de afîşê konserî ameyê bicakerdene û şar seba konserî yeno silaynayene. Yeno pawitene ke des hezar kesî beşdarê konserî bibê û şaristananê derûdorî ra zî muzîkhesî bêrê beşdarê şayî bibê. Koma Amed xo seba şaristanê vîr û eşqî, Amed amade kena.
Provayanê konserî dest pêkerd
Endamê kome Suleyman, Serhad, Memo Gul û Serap Sonmez ameyê Stenbol û dest bi provayanê konserî kerd. Koma Amed û orkestraya ci studyoyêkê Stenbolî de çend rojî yo amadekarîyanê konserî kenê. Deyîran ser o xebitîyenê û bi baldarî xebitîyenê. Kome do deyîranê yewbînan ra weşêran reyde Amed de vejîyê vernîya şarî.
Do Amedstore de formayan îmza bikerê
Endamê kome do roja 23ê teşrîna verêne şêrê Amedstore ya nêzdîyê stadyûmî. Hunermend do uca de programê îmzakerdişê formayan bikerê heskerdoxanê xo reyde bêrê têhet.
