Bedîrxan Çetînkaya ke serra 2016î de bi rayîrê KHK’yî kar ra amebi vetene, dîyar kerd ke vera ney o agêrayo dewa xo û uca de cuyêk û ekonomîyêko alternatîf awan kerdê.
Îqtîdarê AKP’yî darbeya 15ê temmuza 2016î ra pey bi rayîrê KHK’yî 125 hezar û 612 kedkarî karî ra vetê. Nêzdîyê 10 serrî yo xoverdayîşê kedkaran ê vera KHK’yî dewam keno. Nê prosesî de xeylê kedkaran cuya xo vîndî kerde û gelekan zî seba ke debara xo bikerê karê cîyayî kerdê. Nê kedkaran ra yew zî Bedîrxan Çetînkaya yo. Çetînkaya 2016î de karî ra ameyo vetene. Dima ke karî ra yeno vetene, agêreno dewa xo ya bi nameyê Fidêla ya qezaya Sûr a Amedî û dest bi karê ramitişî keno. Wexto ke kar ra yeno vetene, Serekê AKP’yî yê Ispartayî Osman Zabun înan ra vato, ‘Wa kokê dare biwerê.’ Bedîrxan Çetînkaya vera nê vatişan agêrreno dewa xo, xo rê cuyêka newa awan keno û wazeno cewab bido sîstemî û nê vatişan. Bedîrxan Çetînkaya derheqê mê prosesî û karo ke nika keno ajansê ma rê qisey kerd.
‘Seba ke ma waştişê cuyêka hempare kerd, ma karî ra eştê’
Bedîrxan Çetînkaya dîyar kerd ke o 15 serrî sey kedkarê ray pêroyî xebitîyayo la her tim karê kede û sendîkayî zî kerdê û wina vat: “Tirkîya de xeylê çîyî xeletî bîyêne. Ma zî vera nê çîyan bîyê. Ma vatêne wa tu kes cuya xo vîndî nêkero, dayîkîş nêbermê. Darbeya 2016î ra pey ez aşma teşrîna verêne ez kewta hepisxane û 29ê teşrîna verêne de ez karî ra veta. Kesê muxalîf, aştîwaz karî ra ameyê vetene. Waştişê ma her tim cuyêka hempare û birûmete bîye. Seba ney ma karî ra vetî.”
‘Mi cuyêka alternatîfe awan kerde’
Bedîrxan Çetînkaya ard vîrî ke dima ke ê karî ra vetê, AKPyîjan înan ra vato, ‘wa kokê dare biwerê’ û nê çîyî vatî: “Vera nê vatişî ez zî agêraya herra xo ser o. Mi dewe de darê vam û fisitkan ronayê. No 6 serrî yo ez dewe de ciwîyena. Demo ke ez ameya dewe tu çîyê mi çin bi. Mi tîya de heme çîyê xo awan kerd. Bi serran o ez dewe de xebitîyena. Mi dewe de cuyêk û ekonomîyêko alternatîfî awan kerdê. Seba ke ma vera sîstemî vinderê ez tîya de ya. Ma kokê dare nêwenê, ma tîya de daran ronenê. Kok tîya de yo, kam wazeno wa bêro biwero. Ma tîya de cuyêka birûmete ciwîyenê.”
