Nuştox Veysele Avci qerarê Têgêrayîşê Azadîya Kurdîstanî yê peyseragêrayîşî analîz kerd û ard ziwan ke nê prosesî de dewlete ro berpirsîyarîyêka girse kewta û gamê lazimî bilez ganî bêrê eştene.
Îdareyê Têgêrayîşê Azadîya Kurdîstanî Qendîl de bi eşkerayîyêka tarîxîye, bi qerarê Rayberê Şarê Kurdî Abdullah Ocalan û bi qerarê Kongreya 12. ya PKK’yî qerar da ke hêzanê xo yê Tirkîya bianco Herêmanê Pawitişî yê Medya.
Bi nê qerarî 25 gerîlayê HPG û YJA Starî peyser agêrayî û na zî eşkerayîye de ame îlankerdene.
Nuştox Veysele Avci ANF’yî rê qisey kerd û vat ke no prosesê peyseragêrayîşî ganî prosesanê peyseragêrayîşanê verênan cîya bêro erjnayene. Avciyî vat: “Bi taybetî nê peyseragêrayîşî yew hetêko muhîm est o: No peyseragêrayîş goreyê pêdîyayîşanê dewlete qewimîyeno. Têgêrayîşo Sîyasî yê Kurdî bêsebeb hêzanê xo peyser nêberdî. Kongreya 12. de yew qerar ameyo girewtene. Nê qerarî de PKK’yî xo fesh kerd û qerar da ke heme unsûranê leşkerîyan ê zereyê welatî peyser bianco. Ma heme şahîdê merasemanê veşnayîşê çekan ê. Coka meseleya bingeyine uca de na ya: PKK’yî û Têgêrayîşo Sîyasî yê Kurdî seba haştîye her çî kerd.
Prosesanê verênan de tayê hêzê zereyê dewlete, seba ke no tewir prosesan sabotaj bikerê, tayê falîyetê provokasîyonî kerdî. Ewro ma vînenê ke Têgêrayîşo Sîyasî yê Kurdî û Rayberê ci, Birêz Abdullah Ocalan, derheqê nê meseleyan de her çîyo ke dest ra ameyo, kerdo.”
‘Dewlete na game ganî raşt bierjno’
Avciyî ard ziwan ke seba ke prosesê aştîye pozîtîf dewam bikero verê, dewlete û îqtîdarî rê berpirsîyarîyêko girse kewta û dewam kerd: “Teqrîben yew serr o Têgêrayîşo Sîyasî yê Kurdî her gamê ke eşkîyayêne, eştî. Soz da ke têkoşînê çekdarî nêdo şuxulnayene. Gama tewr peyêne zî na bîye ke unsûranê leşkerîyan Tirkîya ra vejo teber. Na game zaf muhîm a.
Dewlete na game ganî raşt bierjno. Peyseragêrayîş, wefadarîya sozan a û wina yew bi yew caardişê praktîkî yê. Bi yewna mana kurdî qerardarîya xo ya hetê aştîye nîşan danê.
Labelê çira dewlete yew serre de gamêk nêeşta? Persa ke ganî bêro persnayene na ya. Derheqê naye de tena dewlete ra ganî hesab nêro persnayene. Heme teferê ke komîsyonî de ca gênê û heme partîyê sîyasî zî derheqê naye de berpirsîyar ê. Bi taybetî berpirsîyarîya tewr girse yê MHP’yî ya. MHP tena bi eşkerayîyan vano ke ez zî nê prosesî de est a.”
‘Ganî proseso qanûnî dest pêbikero’
Avciyî îfade kerd ke roja ke prosesî dest pêkerd, Têgêrayîşo Sîyasî yê Kurdî îsrar keno ke aştî û komelê demokratîkî bêrê awankerdene û vat: “Têgêrayîşo Sîyasî yê Kurdî bi gamanê şêberan ke eştê, vano ez rayîranê çareserîyanê demokratîkan wazena. Labelê dewlete derheqê naye de gamêk nêeşta. Komîsyonê Meclîsî bilez ganî Birêz Ocalanî reyde bêro têhet, dewlete zî gamanê qanûnîyan ganî bierzo. Heta ke nê gamî nêrê eştene, komelî de etirî vejîyenê meydan û komel bawerîya xo ya nê prosesî vindî keno. No ganî bêro raştkerdene. Ganî rêzkerdişê qanûnî bêrê kerdene ke komelî pêro qane bikero. Dewlete çira game nêeşta, na ganî bêro persnayene. No proses do herkesî biresno serkewtişî.”
