Hemserekê Pêroyî yê DEM Partî Tuncer Bakırhanî kombîyayîşê partîya xo de hedîseyê derheqê prosesê Aştî û Komelê Demokratîkî de erjnayî. Bakirhanî kombîyayîşî ra pey cewab da persanê rojnamegeran û vat: “Ganî Demîrtaş û Yuksekdag û heme embazê ma veradîyê. Ganî komîsyon seba çareserkerdişê meseleyê seserrî şêro Ocalanî bigoşdaro.”
Hemserekê Pêroyî yê Partîya Têduştî û Demokrasî ya Şaran (DEM Partî) Tuncer Bakirhan kombîyayîşê hewtane yê partîya xo de derheqê babetanê ke rojeve de yê, erjnayîşî kerdî.
‘Ganî no şerm biqedîyo’
Tuncer Bakirhan dîyar kerd ke 9 serrî ra ver hemserekê înan ê pêroyî zî tede, xeylê parlamenter û rayberê partîya înan ameybî girewtene û wina vat: “A roje eynê wextî de caardişê îqtîdarî yê vera sîyasetê şarê kurd bi. Vera rayîro 3. bi. Vera aştî bi. No kerdiş bi destsernayîşê şaredarîyanê ma dewam kerd. Xeylê embazê ma gure ra ameyê girewtene. DMME’yî seba Demîrtaşî qerarê veradayîşî da. No qerar êdî teqez bîyo. Ganî Tirkîya nê qerarî bîyara ca û bilez sere de Fîgen Yuksekdag û Selahattîn Demîrtaş û heme embazê ma veradîyê. Reyna ganî heme girewteyê sîyasî veradîyê û embazê ma ke teberê welat de yê ganî ê zî agêrê û sîyaseto demokratîk bikerê.”
‘Tezîyeyan rê rêze bigîrê’
Tuncer Bakirhanî bale ant astengîyanê vera tezîyeyanê endamanê HPG û YJA-Star yê Şirnex û Rihayî ser o û wina vat: “Wa dewlete şarî rê zilm nêkera. Problemî ne bi şer û ne bi pirodayîşî çareser nêbenê, ganî bi muzakereyan bêrê çareserkerdene. Ma hêrişê vera tezîyeyan yenê kerdene, şermezar kenê. Aştî bi rêzgirewtişî mumkin a.”
‘Ma do seba heqanê karker û kedkaran têkoşînê xo bidomnê’
Tuncer Bakirhanî derheqê meseleyê ekonomîyî de zî dîyar kerd ke bi hezaran kesî bi vêşanîye reyde rî bi rî yê û wina vat: “Rixmê nê zî îqtîdarî bacanê giranan welatijan ser o ferz keno. Na rewşa xirabe daneyanê îqtîdarî de zî est a. Na feqîrî şermê îqtîdarî ya. Meaşo asgarî enflasyonê ver kêm maneno. Kedkarê nê welatî cuyêka însanî heq kenê. Ganî meaşo asgarî 46 hezarî ser o bo û goreyê enflasyonî zî serre de 2 reyî bêro newekerdene.”
‘Ganî Demîrtaş û Yuksekdag û embazê ma bilez veradîyê’
Tuncer Bakirhan kombîyayîşî ra pey cewab da persanê rojnamegeran. Tuncer Bakirhanî derheqê persê vatişanê Devlet Bahçelî de seba tehlîyeya Selahattîn Demîrtaş zî dîyar kerd ke ê Devlet Bahçelî rê sipas kenê û vat: “Devlet Bahçelî rast vato. Xeylê qerarê DMME’î est ê ke derheqê veradayîşê embazanê ma de yê. Ganî sere de Selahattîn Demîrtaş û Fîgen Yuksekdag û heme embazê ma yê ke Dewaya Kobanî de yenê muhakemekerdene, veradîyê.”
‘Ganî komîsyon şêro Ocalanî bigoşdaro’
Tuncer Bakirhan persê şîyayîşê Komîsyonî yê hetê Rayberê Şarê Kurdî Abdullah Ocalanî ser o zî vat: “Seba çareserkerdişê meseleyê seserrî ganî komîsyon şêro muxtabo sereke reyde pêvînayîş bikero, wina do proses avêr şêro. Bakirhanî dîyar kerd ke heyetê partîya înan îhtîmalêko pîl şîyayîşê komîsyonî zî Serekkomarî ra vato.
