Bi qirkerdişê 19ê Kanûne, Mereş, Parîs û Roboskî û rojnamegeran Nazim Daştan û Cîhan Bîlgîne, komel û merdimeyî ra hêriş ame kerdiş. Seba ke cipersayişêko bi edelet nêame kerdiş, edelet cayê xo nêdî. Ganî hetanî nika kiştoxê nê qirkerdişan biameynê daraznayiş
Tarîxê awanbîyayişê Komara Tirkîya sey komara qirkerdişan yena namekerdiş. Erdîşê Wanî, Newala Zîlanî de bi deshezaran Kurd ameyê kiştiş. Hewna bi qerarê Heyetê Wezîran Dêrsim de tewro kêm 14 hezar Kurdê Elewîye ameyê qetilkerdiş, qirkerdiş ra zî pey sey zîhnîyetê DAIŞî kênayê dêrsimijan destê înan ra girewtê û berdê şaristanê bînî yê Tirkîya.
Serra 1990î de bi hezaran dewanê Kurdan ameyê vengkerdiş û bi mîlyonî Kurd zî nêçare koç kerdê û bi deshezar Kurdî zî çi heyfo ke bi rêgeza cînayetê meçhulî ameyî qetilkerdiş.
Çi heyfo ke zereyê aşma kanûne de zî zaf rojê qetilkerdişê Kurdan est ê. Çimkî Qirkerdişê Hepisxaneyan ê 19ê Kanûne, Mereşî, Parîsî û Roboskî na aşme de ame cuyayiş. Tewro peynî rojnameger Nazim Daştan û Cîhan Bîlgîn ameyê kiştiş. Kiştoxê heme qirkerdişan zî dîyar ê la belê hetanî nika nêameyê dîyar kerdiş.
Bi nê qirkerdişan komel û merdimeyî ra hêriş ame kerdiş. Seba ke cipersayişêko bi edelet nêame kerdiş, edelet cayê xo nêdî. Ganî hetanî nika kiştoxê nê qirkerdişan biameynê daraznayiş.
Qirkerdişê Roboskî zî çi heyfo tarîxî ra sey qirkerdişê kiştoxê nêdîyar vîyart. Roboskî de bi teyyaran bi desan Kurd ameyî qetilkerdiş û 13 serrî vîyartî, la nê 13 serran de kiştoxî nêameyê cezakerdiş û cipersayîşê ke derheqê qirkerdişî de amebî destpêkerdiş zî ti netîceyêke nêdaye. Şarê Roboskî zaf domanê xo qirkerdişê Roboskî de vînî kerdî.
Doman û merdimanê Roboskî seba ke debara keyeyî bikerê, derbasê Başûrê Kurdîstanî bîbî. Înan waşt ke uca ra çay û şekir bîyarê. Na roje 34 dewijê Roboskî derbasê sînorî bîyê, la raştê hêrişê teyareyanê şerî ameyî û ameyî kiştiş. Verê qetilkerdişê domananê xo xeylêk dewijan cerdevanîye kerdêne, labelê qirkerdişê domananê xo ra dima înan êdî fek verada. Ê seba ke qetilkarê domananê înan bêrê cezakerdiş, peyê doza edaletî de yê.
Qetilkerdişî ra apey serrî vîyartî, la hema zî kiştoxî nêameyî dariznayîş. Malbatê Roboskî zî wazenê edalet bêro caardene. Ê veng danê ke kesanê ke no qirkerdiş viraşt, wa bêrê cezakerdiş. Çi heyf ke Tirkîya de edalet çin o. Rayedarê Tirkîya waran de qîrenê û vanê Artêşa Tirkîya sivîlan nêkişena, la yeno persayîş “eke leşkeran no qirkerdiş nêkerdo, kamî kerdo?” Badê cû eşkera bî ke dewleta tirke no qirkerdiş kerdo. Nê teyareyê Amerîka û Rusya bîyê, teyareyê Tirkîya bîyê.
Şarê Roboskî neçarîye û feqîrî ra bîyo cerdevan, yanî bi zerrîya xo nêbîyo cerdevan. Qirkerdiş ra dima înan çekê dewlete nêhawanayî û nê çekî veradayî. Waştişê înan têna edalet o û ê wazenê ke peynîya nê qirkerdişan bêro.
No dem Erdogan serekwezîr bî û cade fermandarê qirkerdişî fîraz kerd. Wezîrê Karanê Zereyî zî bi qisaya xo “ê cara qeçaxçî bîyê” qirkerdiş meşrû kerd. Yanî ey bi hawayêkê zelalî şarê Roboskî terorîst nîşan da. Nê meşrûkerdişî rayîr da dezgehanê selahîyetdaran ê bînan zî. Serdozgerîya Komare ya Amedî tehqîqatêk akerd, la verê ke proseso huqûqî bêro destpêkerdene tehqîqat ame qefilnayene.
Îfadeyê mesuldaranê qirkerdişî nêame girewtene. Îqtîdarê AKPyî zî seba ke proseso huqûqî nêro destpêkerdiş, pêro hêzê xo seferber kerdî. Îqtîdarî kerd ke keyeyanê 34 qurbanan bi tepiştiş û destbendkerdişî bêveng bikero.
