Hemseroka Dayîreyê Têkilîyanê Teberî yê Herêma Xosere Îlham Ehmed da zanayene ke Sûrîye de meselayî hema çareser nêbîyê û bale ante zîyaretê Şarayî yê ABD ser. Îlham Ehmed va ke proses şîyo Washington û wina domna: “Ganî agêrayîşê Washingtonî ra dima dîyalog dewam bikero.”
Hemseroka Dayîreyê Têkilîyanê Teberî yê Herêma Xosere ya Vakur û Rojhelatê Sûrîye Îlham Ehmed, Konferansê Yewîyeya Resnayîşî ya Cinîyan ê 4. (Yekitiya Ragihandina Jin – YRJ) o ke Unîversîteya Rojawanî ya Qamişloyî de ame viraştene de qisey kerd.
Goreyê xebera ke ajansê xeberan ê ANHA de ca girewte, Îlham Ehmed bale ante ser ke Sûrîye de dima ke rejîm vurîya zî meseleyî hema çareser nêbîyê û wina va: “Meselayê ke estê çareser nêbîyî, la hêzê teberî wazenê ke înan lez û wextêko kilm de çareser bikerê. Nika proses şono Washington.”
Îlham Ehmed ard vîr ke Konseya Asayîşî ya Mîletanê Yewbîyayeyan (BMGK) pîya bi ABD û Îngîltere mueyîdeyê terorî yê ke hukmatê Sûrîye yê demkî Ahmed El Şara û Wezîrê Karanê Zereyî Enes Hattab ser o bî, wedaritî û nê çîyî vatî: “Ma wazenê ke mueyîdeyî bêrê wedarîtene, la ganî vurîyayîşî bêrê kerdene. Dîyalogo zereyî zaf zeyîf o. Seba ney yew parlamento yeno hazirkerdene, la tayê heremê Sûrîye tewr nêbîyî. Kêmîyî estê, heqê şaran nêameyî şinasnayene. Coka zaf kêmîyî estê. Ganî dîyalog bêro averberdene û qanûno bingeyên o ke virazîyayo, bêro vurnayene. Ma behsê muzakereyan kenê. Gamê muhîmî ameyî eştene. Ganî agêrayîşê Washingtonî ra dima dîyalog dewam bikero.”
Bale ante rolê Tirkîya ser
Îlham Ehmede proseso ke Tirkîya de seba çareserkerdişê mesela kurdan dewam keno, ey ser o zî vinderte û tesîrê ney yê serê Sûrîye ercna. Ehmede wina domna: “Ewro ma wazenê ke Şamî reyde meselanê xo çareser bikerê. No babete de ma cîddî yê. Ganî Tirkîya zî seba ke mesela kurdan çareser bikero û demokratîk biba, gameyê pozîtîfî berzo. Eke Tirkîya de aştîye biba, rolê Tirkîya yo Sûrîye de zaf muhîm û pîl o. Demokratîkbîyayîş, şinasnayîşê heqanê cinîyan û şaran Tirkîya ya zî Sûrîye zeyîf nêkeno. Aksê ci, hêz keno. Teberê ney de, tehdîtê ke reyna benê sebebê şeran, faydeyê xo çewî rê çin o. Ma nêwazenê behsê şerî bikerê, ma wazenê ke aştîye bêro caardene.”
