Fesîh Kaya yo ke Çarşîyê Şewitî yê Amedî de kincanê kehenan roşeno, dîyar kerd ke êdî şar nêeşkeno kincanê kehenan zî biherîno û vat: “Tayê rojan ez nêeşkena sîftehî zî bikera.”
Vakurê Kurdîstan û Tirkîya de krîzê aborî tesîrêko negatîf komelî ser o keno. Şar sey verî nêeşkeno kincanê neweyan biherîno. Demo ke çîyêko newe biherîno, dikan bi dikan gêreno û çîyanê tewr erzanan herîneno. Riyê vaybîyayîş û krîzê aborî ra welatijî nêeşkenê kincanê neweyan biherînê û bêçareyî verê xo bidê û şêrê kincanê kehenan biherînê. Kinc û solê kehenî dezgeyan ser o vera kincanê neweyan sey alernatîf paweyê mişterîyanê xo yê. Fesîh Kaya yo ke kincanê kehenan roşeno, derheqê rewşa karê xo de qisey kerd.
‘Karê ma xeylê kêm bîyo’
Fesîh Kaya yo 62 serre dîyar kerd ke 10 serrî yo dest bi karê rotişê kincanê kehenan kerdo û wina vat: “Verê mi karê erebeyanê çekçekî kerdêne. Mi nêşinayêne pê debara xo bikera û mi karê çekçekî ra fekverada. Dima mi tîya de dezgeyê kincan akerd û dest bi karê rotişê kincan kerd. Demo ke mi dest pêkerd, no kar biney baş bi. Verî heme çî erjan bi, rojêk de mi xeylê kincî rotêne. Ewro heme çî vay bîyo, seba ey tu kes nêeşkeno êdî kincanê kehenan zî biherîno. Karê ma zaf kêm bîyo.”
‘Tûnika şarî de pere çin ê’
Fesîh Kayayî dîyar kerd ke bi ameyîşê payîzî karê ey bineyna vêşî bîyo û vat: “Demo ke mewsîm beno payîz karê ma biney vêşî beno. Seba ke çakêt û montê neweyî xeylê vay ê, kes nêeşkeno biherîno, o semedî ra xeylê mişterîyî yenê mi ra herînenê. Şar nêeşkeno kincanê neweyan biherîno. La reyna zî kar goreyê verî zaf kêmî yo. Ma zî nêzanê ma do senî bikerê? Tûnika şarî de pereyî çin ê. Tayê roja ma nêeşkenê siftehî zî bikerê.”
