Bi pêşengîya MEBYA-DER’î zîyaretê tezîyeya gerîlayanê PKK’yî Netîce Kozat û Cegerxwîn Mizrakî ame kerdene. Hemsereka MEBYA-DER’î Gurbet Sevîktek vat: “Ma do hewn û xeyalanê şehîdanê xo bîyarê ca.”
Gerîlaya PKK’yî Netîce Kozat (Nesrîn) serra 1996î de qezaya Dara Hênî ya Çewligî û endamê PKK’yî Cegerxwîn Mizrak (Şoreş) zî serra 1998î de qezaya Pîranî ya Amedî de cuya xo vîndî kerdbî. Nasnameyê înan newe ame parekerdene. Keyeyê înan seba vîrardişê gedeyanê xo Keyeyê Tezîyeyî yê Şemrexî yê qezaya Rêzana Amedî de pêşwazîya mêmananê xo kenê.
Bi pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) tezîye ameye zîyaretkerdene. Rayberê MEBYA-DER, rayberê DEM Partî û DBP, rayberê rêxistinanê sîvîl, Dayîkê Aştî û aktîvîstê TJA’yî û xeylê kesî şîyê tezîyaya herdi gerîlayan. Tezîye de fatîhayî amaeyê wendene û seba cangorîyanê têkoşînê azadîye rêze ameye girewtene.
‘Ma do hewn û xeyalanê şehîdanê xo bîyarê ca’
Hemsereka MEBYA-DER’î Gurbet Sevîktek qisey kerd û vat: “Ewro dinya de amanc û waştişê kurdan çi yê? Ganî ma nînan bizanê. Ma bi saya nê şehîdan resayê na qonaxe û ma têkoşînî musayê. Ma bi têkoşînê înan ameyê na aste. Hewt serrî ra hera hewtay serrî çi destê ma ra bêro ma do bikerê. Heta ke destê ma ra bêro ma do hewn û xeyalanê şehîdanê xo bîyarê ca. Ma reyna vanê sereyê keye û şarê ma û serekê ma weş bo.”
